Turuan sila nang maaga! Narito ang listahan ng gawaing bahay para sa mga bata.
Mababasa sa artikulong ito:
- Bakit kailangang turuan ang bata ng mga gawaing bahay ng maaga
- Gawaing bahay para sa mga bata ayon sa kanilang edad
- Mga paalala sa mga magulang pagdating sa pagtuturo ng gawaing bahay
“I’ll do it myself,” laging sinasabi ng aking 2-taong gulang na anak kapag mayroon akong kinukuha para sa kaniya, tulad ng baso ng tubig o kaya ang kaniyang toothbrush.
Habang lumalaki ang ating mga anak, marami na silang bagay na natututunan. Ang mga unti-unti sila natututong maging independent at responsable.
Kung natututo na silang gumawa ng ilang bagay para sa kanilang sarili, panahon na rin siguro para turuan natin ang ating mga anak ng mga gawaing bahay para sa mga bata.
Bakit kailangang turuan ng gawaing bahay ang mga bata nang maaga?
Maliliit pa lang sila ay dapat tinuturuan na ng gawaing bata ang ating mga anak, hindi lang para makatulong sa ating mga magulang, kundi para malaman nila ang kanilang gagawin sa pang-araw-araw kapag wala tayo sa paligid nila.
Ngunit madalas, ang pagtuturo ng gawaing bahay para sa mga bata ay sasalubungin ng pagmamaktol at pagrereklamo.
Pero ayon kay Dr. Eugene Beresin, isang psychiatry professor sa Harvard Medical School at director ng Clay Center for Young Healthy Minds sa Massachusetts General Hospital, pwede namang magbago ang pananaw ng bata sa chores o gawaing bahay kung babaguhin rin natin ang ating approach sa pagbibigay at pagtuturo nito sa ating anak.
Image from Freepik
-
Natututo silang magkaroon ng responsibilidad.
Ayon kay Dr. Beresin, mahalagang i-reframe ng mga magulang ang mga gawaing bahay bilang mga responsibilidad para sa mga bata. Mga responsibilidad na dapat na matutunan, makasanayan at magamit sa kanilang araw-araw na pamumuhay.
Dapat daw ay ipaliwanag ito sa kanila gamit ang dalawang importanteng dahilan. Una, ang paggawa ng gawaing bahay ay isang responsibilidad para mapangalagaan niya ang ibang tao sa paligid tulad ng kaniyang mga kapatid. At pangalawa, ang responsibilidad para mapangalagaan niya ang kaniyang sarili.
-
Tumataas ang kanilang self-esteem.
Dahil dagdag pa ni Dr. Beresin, ang pagbibigay ng responsibilidad sa isang bata sa pamamagitan ng paggawa ng chores ay nagbibigay sa kanila ng pakiramdam ng pagiging special at nagkakaroon sila ng kumpiyansa sa sarili.
Nararamdaman ng bata na mayroon silang kontribusoyn at malaki ang papel nila sa tahanan, kumpara kung uutusan lang sila nang hindi ipinapaliwanag kung bakit kailangan nila itong gawin.
-
Natututo silang maging independent
Nakakatulong rin raw ang pagbibigay sa kanila ng responsibilidad para mas maging competent, efficient at higit sa lahat ang pagbutihin o i-master pa ang kanilang mga dapat gawin.
Sa pamamagitan nito ay mas nagkakaroon sila ng respeto sa sarili at napapatunayan nilang kaya rin nilang maging responsable tulad ng kanilang nakakatandang kapatid.
Bilang resulta, unti-unti silang natututong maging independent at nai-enjoy nila ang paggawa ng gawaing bahay. Kasama na rin rito ang pag-aalaga sa kanilang sarili at sa iba na tanda ng kanilang development at paglaki.
-
Nakakatulong ito sa kanilang development.
Ang paggawa ng mga gawaing bahay ay nakakabuti rin para masanay ng bata ang kaniyang gross motor at coordination skills. May mga chores rin na nakakapagpalakas ng kanilang upper body strength.
-
Natututo sila ng life skills.
Para hindi lumaking “entitled” ang iyong anak, mas mabuting turuan siya ng gawaing bahay nang maaga para alam niya ang kaniyang gagawin kapag wala ka na sa paligid niya at hindi umaasa sa iba.
May mga pag-aaral rin na nagsasabing ang pagbibigay ng chores o gawaing bahay para sa mga bata ay nakakatulong para magkaroon sila ng work ethics at self-reliance na kakailanganin nila sa kanilang paglaki.
BASAHIN:
“Mamaya Na!”: 3 parenting mistakes kung bakit nasasanay ang bata na sabihin ito
Dads willing humati sa bayarin pero hindi sa gawaing bahay, survey says
Why you should get your boys to do household chores
Listahan ng gawaing bahay para sa mga bata ayon sa kanilang edad
Para mas maturuan sila tungkol sa gawaing bahay, narito ang listahan ng chores o responsibilidad na maaring ipagawa o ituro sa ating mga anak na akma sa kanilang mga edad at kakayahan.
Toddlers (1-2 years old)
Maging ang maliliit na bata ay maarin na ring gumawa ng mga simple tasks sa bahay. Makakatulong ang pagturo sa kanila ng maaga para matuto silang maging independent habang sila ay lumalaki.
Sa ganitong edad, nag-eenjoy pa rin ang mga bata na matuto ng mga bagong bagay at kopyahin ang ginagawa ng mga tao sa kanilang paligid. Paalala lang na dapat bantayan mo pa rin ang iyong anak habang ginagawa niya ito para makaiwas sa mga aksidente.
- maglagay ng tubig o gatas sa kanilang baso
- kumuha ng diaper mula sa lagayan
- magligpit ng kanilang mga laruan.
- maglagay ng kanilang mga maruming damit sa labahan.
- magdilig ng mga halaman
- Tumulong kay Mommy o daddy kapag may inuutos (paki kuha ito, o pakitapon ito)
Preschoolers (3-5 years old)
Ang mga easy at light task ay maari ng ibigay sa mga preschoolers. Dapat lang na tandaan na sila ay purihin sa kanilang job well done para sila ay mas sipagin na ulitin itong gawin.
- Pagpapakain sa alagang aso o pusa. O paglalagay ng tubig sa inuman nila.
- Pagtulong ng paglalagay ng mga plato sa mesa tuwing kakain.
- Pag-aayos ng mesa matapos kumain tulad ng pagdadala ng plato sa lababo.
- Pagbibigay ng laruan o pagpapakain sa nakakabatang kapatid.
- Pagsort ng mga labahin.
- Paglalagay ng mga natuping damit sa cabinet
- Pagtatanggal ng damo sa garden.
- Pagpupunas ng dumi.
- Pag-aayos sa kanilang higaan.
School-age kids (6-12 years old)
- Paghahain ng pagkain sa mesa.
- Pagliligpit ng mesa pagkatapos kumain.
- Paghuhugas ng platong pinagkainan.
- Pagtatapon ng basura.
- Pagtulong sa pagluluto.
- Pagtulong sa pagtutupi ng damit.
- Pagpapasyal sa alagang hayop.
- Pagwawalis ng sahig.
- Paglilinis ng kaniyang kwarto.
- Paglalampaso ng sahig.
Teenagers (13 years old pataas)
- Pag-aayos ng pinamiling groceries.
- Pagbabalat ng gulay o prutas.
- Pagluluto ng ulam o pagkain.
- Pagsasaing ng kanin.
- Paglalaba at pagtutupi ng damit.
- Pamamalantsa ng damit.
- Pagtatahi ng butones sa sira nilang damit.
- Paglilinis ng bahay.
- Pag-aalaga sa nakababatang kapatid.
- Paghuhugas ng kotse o sasakyan.
Larawan mula sa Freepik
Paalala sa mga magulang
Tandaan, hindi agad magiging perpekto ang paggawa ng iyong anak sa isang task. Ang mahalaga ay nasimulan na niyang subukang gawin ito. Subukan mo ring maging specific sa iyong utos at sabihin ito nang dahan-dahan para mas madali itong intindihin ng bata.
Kung sakaling siya naman ay nagkamali, huwag siyang agad na husgahan o pagalitan. Malumanay na ipaalam sa kaniya na ang pagkakamali at ituro ang tamang paraan ng paggawa nito.
Ilagay ang paggawa ng chores sa daily routine ng iyong anak para makasanayan niya ito, pero panatiliin pa ring balanse ang pagbibigay ng responsibilidad sa kanila sa gawaing bahay, eskwelahan at kanilang komunidad.
Huwag ding kalimutang purihin o pasalamatan ang iyong anak sa tuwing siya ay nakakagawa ng maayos na gawaing bahay.
Higit sa lahat, gawing fun ang mga gawaing bahay para sa bata, at bigyan rin sila ng sapat na oras na maglaro o gawin ang mga bagay na kinahihiligan nilang gawin.
Kung nasanay naman ang iyong anak na mayroong ibang taong gumagawa ng gawaing bahay para sa kaniya, hindi pa huli ang lahat. Maari mo pa rin siyang turuan at ipaintindi mo sa kaniya na kailangan niyang matutunan ito dahil magagamit niya ito sa kaniyang paglaki.
Source:
Psychology Today, WebMD, Child Development Institute
karagdagang ulat ni Camille Eusebio
May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!
