Ang epekto sa kalusugan kapag pinapadede nang nakahiga ang baby

Ang epekto sa kalusugan kapag pinapadede nang nakahiga ang baby

Narito ang sakit na maaring makuha ng iyong anak kung siya ay pinapadede mo ng nakahiga. Alamin kung ano ang sakit na ito at paano ito maiiwasan

Impeksyon sa tenga ng sanggol, ito ang unang makukuha ng iyong baby kapag siya ay pinapadede mo nang nakahiga.

Pagpapadede ng nakahiga sa sanggol

Malamang nasubukan o nagawa ninyo ng padedehin ang inyong baby sa bote ng nakahiga. Ngunit dapat pagkabasa ninyo ng artikulong ito ay hindi niyo na ulitin sapagkat ito pala ay maaring magdulot ng masamang epekto sa kalusugan ni baby.

Maliban sa maari siyang magsuka at ma-choke sa posisyon na ito sa pagpapadede ay maari ring mapunta ang gatas sa tenga ni baby na maaring magdulot ng impeksyon. Ang impeksyon na ito ay tinatawag na otitis media o ear infection.

impeksyon sa tenga ng sanggol

Image from Freepik

Impeksyon sa tenga ng sanggol o otitis media

Ang impeksyon sa tenga ng sanggol o otitis media ay madalas na nararanasan ng mga 6 na buwang gulang na sanggol hanggang sa tatlong taong gulang na bata.

Ito ay dulot ng bacteria o germs na maaring nanggaling sa lalamunan paakyat sa ating middle ear. Sa mga kaso ng mga baby ang gatas na kanilang dinede ay maaring tumulo papunta sa kanilang tenga kapag nakahiga. Dahil sa ito ay basa ay maaring pamahayan ito ng germs at magdulot ng impeksyon sa tenga ng sanggol.

Ang otitis media ay maari ring maging komplikasyon ng pagkakaroon ng allergy, sipon, o ng impeksyon sa ilong o lalamunan. Hindi naman ito seryosong kondisyon at hindi nakakahawa ngunit nangangailangan ng medikal na atensyon. Ito ay dahil sa mga sintomas nito na nagdudulot ng discomfort sa isang sanggol.

Paano malalaman kung may impeksyon na sa tenga si baby

Dahil hindi pa nakakapagsalita ay hindi makakapagsabi ang iyong baby ng pananakit sa tenga na pangunahing sintomas ng sakit. Magkaganoon pa man ay may mga sintomas ang otitis media na iyong mapapansin sa iyong baby. Ito ay ang sumusunod:

  • Lagnat
  • Pagiging fussy o irritable
  • Hirap makatulog
  • Hinihila o paulit-ulit na hinahawakan ang kaniyang tenga
  • Hindi makarinig ng mahihinang tunog

Kung mapapansin ang mga nasabing sintomas ay agad na pumunta sa iyong doktor upang matingnan niya ang loob ng tenga ni baby. Lalo na kung ito ay sinasabayan ng sumusunod pang mga sintomas o kondisyon:

  • Kung si baby ay wala pang anim na buwan at may lagnat.
  • Si baby ay lagpas anim na buwan na at nilalagnat ng tatlong araw o 72 oras na.
  • Namamaga na ang tenga.
  • Hindi nakakarinig ng maayos.
  • Sobrang antukin.
  • Mayroong skin rash.
  • Nakakaranas ng iba pang serious medical problems.
  • Hindi nawawala ang sakit ng tenga kahit umiinom na ng acetaminophen o ibuprofen sa loob ng 2 araw.

Ang acetaminophen o ibuprofen ay inirereseta ng doktor para mabawasan ang pananakit sa tenga ng isang sanggol. Isang paalala, hindi dapat ibinibigay ang ibuprofen sa mga sanggol ng 6 buwan pababa ng walang go signal ng iyong doktor. Dahil ayon sa mga pag-aaral ito ay maaring magdulot ng gastrointestinal effects, renal failure at Reye’s Syndrome sa mga sanggol.

Samantala, ang pangunahing paraan naman para malunasan ang impeksyon sa tenga ng sanggol ay sa pamamagitan ng antibiotics. Ito ay para mapatay ang germs at bacteria na nagdudulot ng impeksyon.

Paano maiiwasan ang impeksyon sa tenga ng sanggol

Para naman maiwasan ito ay dapat gawin at tandaan ang mga sumusunod:

  • Ugaliing mag-hugas ng kamay para makaiwas sa mga mikrobyong maaring magdulot ng sipon kay baby.
  • I-breastfeed si baby dahil ang gatas ng ina ay nagtataglay ng mga antibodies at nutrients na mas nagpapalakas ng immune system ni baby laban sa mga sakit. Tandaan lang sa tuwing padedein siya ay dapat mas mataas ang kaniyang ulo sa kaniyang paa.
  • Iwasang padedein si baby ng nakahiga. Sa tuwing padedein naman si baby gamit ang bote o bottle feeding ay siguraduhing siya ay naka-upright position. O ang posisyon na tila nakaupong pahiga. Siguraduhin din na hindi masyadong malaki ang butas ng tsupon ng kaniyang dede. Para siya ay hindi malunod at mabilaukan.
  • Huwag palaging pagamitin ng pacifier si baby.

Makakatulong rin bilang dagdag na proteksyon kay baby ang pagpapabakuna sa kaniya laban sa pneumonia o pneumococcal vaccine. Pati na ang pagbibigay ng flu shot sa kaniya taon-taon.

Ang otitis media ay madalas na nararanasan ng mga premature na sanggol at mayroong cleft palates. Mataas din ang tiyansang maranasan ito ng mga batang may mga allergies at nai-expose sa usok ng sigarilyo.

 

Source: NBCI, Livestrong, NCBI
Photo: Freepik

Basahin: #AskDok: Kailangan bang painumin ng vitamins ang mga newborn?

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!

app info
get app banner