5 na hindi dapat sinasabi ng tatay sa kanyang anak

Tayong mga magulang, ang nais lang natin sa ating mga anak ay ang mga makabubuti para sa kanila. Lahat ng bagay ay binibigay natin sa kanila kung makakaya. Sa kagustuhan nating mapabuti sila, hindi natin alam na nagiging maling pagdidisiplina ng magulang sa anak ang nagagawa natin.

5 na hindi dapat sinasabi ng tatay sa kanyang anak

Malaking bagay rin ang mga salitang binibitawan natin sa kanila kapag pinapangaralan o dinidisiplina. Narito ang limang bagay na hindi dapat sinasabi ng tatay o nanay sa kanyang anak.

Maling pagdidisiplina ng magulang sa anak | Image from Unsplash

“Masama kang bata!”

Sino man ang masabihan ng ‘masama’ ay talaga namang masakit sa kanilang kalooban. Lalo na kung bata ang sinabihan mo ng salitang ito. Hindi pa nila nauunawaan ang mga bagay at ang salitang ‘masama kang bata’ ay tatatak sa kanilang isip. Oo, may pagkakataong pasaway sila at talaga namang mauubos ang pasensya mo sa katigasan ng ulo. Ngunit tandaan natin na bilang magulang, responsibilidad nating itama ang kanilang kamalian at gabayan sila habang lumalaki.

Imbes na sabihan na masamang bata ang iyong anak kapag nagkamali, bakit hindi mo ito kausapin at sabihing mali ang ginawa niya? Ipaliwanag rin kung bakit ito mali at kung bakit hindi niya dapat ulitin pa.

“Bakit hindi mo tuluran ang kapatid mo?”

Masakit ang makumpara lalo na sa sariling mong kadugo. Kapag nasanay ang iyong anak sa salitang ganito, marami ang mangyayari at magbabago sa kaniya. Una, lalaki itong may pagdududa sa kaniyang kakayahan. Lahat ng kaniyang galaw o desisyon ay iisipin nitong mali. Mas iisipin muna nito ang sasabihin ng iba bago siya gumalaw. Pangalawa, maaaring magtanim ito ng sama ng loob sa kapatid. Pangatlo, maaaring lumayo ang loob nito sa kaniyang mga magulang.

Maling pagdidisiplina ng magulang sa anak | Image from Freepik

Ang kompetisyon sa magkakapatid ay talaga namang delikado at maaaring makasira sa kanilang pagsasama. Kaya naman hanggat bata pa, ‘wag maging pinto para sa pag-aaway ng mga ito.

“Kung talagang mahal mo ako…”

Ang mga salitang ito ay may dala-dalang maraming rason. Iba’t-ibang emosyon rin ang nasa likod nito at maaaring maramdaman ng iyong anak. Hindi magandang gawain bilang isang magulang ang ipitin sa isang sitwasyon ang kaniyang anak na hindi niya lubusang naiintindihan. Katulad na lamang ng mga salitang ito.

Kapag sinabi mo ito sa iyong anak, mararamdaman niya ang guilt at pamimilit ng isang magulang sa kaniya. Mararamdaman niya na kailangan ka niyang sundin dahil ‘mahal’ ka niya. Ang kaniyang desisyon ay dala ng iyong pamimilit.

“Wag kang mahiya.”

Hindi lahat ng bata ay kayang sumayaw, kumanta o magpakitang gilas sa harap ng maraming tao. Kung isa ang iyong anak sa mga batang mahiyain at takot sa makisalamuha sa maraming tao, maaari namn itong mabago. Ngunit hindi kailangang bigyan ng dahas o pressure ang bata para lang gawin ang bagay na hindi siya confident gawin.

Maling pagdidisiplina ng magulang sa anak | Image from Unsplash

Malalabanan ang pagiging mahiyain sa tulong ng magulang. Pagsasanay, pagsuporta at paghahanda ang pinaka sikreto para maging confident ang iyong anak.

“Mas makabubuti sa’yo ito. Sundin mo ako!”

Oo, bilang nakakatanda ay alam na natin kung paano umikot ang mundo. Ang pagpapalaki sa ating mga anak ay nakadepende sa atin. Kung ano ang galaw natin, ganun rin ang makakasanayan ng bata. Ngunit hindi lagi ay ganito ang konsepto. Habang lumalaki ang iyong anak, may mga bagay na natututunan niyang gawin at nakakagawa ng sariling desisyon ng walang gabay mo.

Tandaan natin na may sariling buhay ang ating anak at hindi lahat ng gusto natin ay kailangan nilang gawin.

BASAHIN:

Ang mga salitang hindi mo dapat sinasabi sa iyong anak

Masakit magsalita? 10 bagay na hindi dapat sinasabi ng mag-asawa sa isa’t-isa