Gabay sa wastong pag-karga sa iyong newborn

lead image

May iba’t-ibang paraan kung paano hawakan ang sanggol ngunit ang pinakaimportante rito ay ang pagbibigay suporta sa kaniyang ulo at leeg na mahina pa lalo na sa mga newborn.

Paano hawakan ang sanggol? Tanong na hindi lamang maririnig sa mga first-time parents kundi pati narin sa iba pang magulang na natatakot hawakan ang kanilang newborn baby. Ito ay dahil sa pag-aalala na baka masaktan ang mahina at malambot pa nilang katawan.

Kaya naman para masiguro ang kanilang kaligtasan sa iyong mga kamay, narito ang mga tamang paraan kung paano hawakan ang sanggol na hindi lang magiging komportable para kay baby kundi pati narin sa taong humahawak o nagkakarga sa kaniya.

Tamang paraan kung paano hawakan ang sanggol

1. Hugasan ang iyong mga kamay

Bago humawak o kumarga ng sanggol, siguraduhing malinis ang iyong mga kamay. Ito ay para maiiwas ang sanggol sa mga germs at bacteria na maaring makasama sa kaniyang mahina pang kalusugan. Hugasan ang iyong mga kamay ng tubig at sabon para masiguro ang kalinisan nito. Maghanda rin ng hand sanitizer o alcohol para sa mga taong gustong hawakan at kargahin si baby.

2. Maging komportable sa paghawak kay baby.

Para maging komportable si baby habang siya ay hawak mo, kailangan rin na komportable ka o confident sa paghawak sa kaniya. Sa una ay nakakaba at nakakatakot humawak ng isang sanggol, ngunit sa pagdaan ng ilang minuto ay masasanay ka rin at magiging komportable sa paghawak sa kaniya.

Ayon kay Dr. Laura Jana, isang Omaha-based pediatrician at author ng “Heading Home with Your Newborn”, nararamdaman ng isang sanggol ang stress o kaba ng humahawak sa kaniya. Kaya naman kahit kinakabahan ay dapat makipag-usap kay baby sa mahinahon at kalmadong boses ang humahawak sa kaniya.

3. Bigyan ng suporta ang katawan ni baby.

Ayon parin kay Dr. Jana, ang pinakamabigat na parte ng katawan ng isang newborn baby ay ang kaniyang ulo at ang leeg naman nito ay wala pang ganap na lakas. Kaya naman sa paghawak kay baby kailangan laging nakasuporta ang kamay ng kumakarga sa kaniya sa kaniyang ulo at leeg. Ganun din sa kaniyang puwetan na may dala naman ng bigat ng kaniyang katawan.

Sa pagbuhat kay baby, ilagay ang isang kamay sa ilalim ng kaniyang ulo at ang isa naman ay sa kaniyang puwetan at dahan-dahan siyang buhatin pataas sa iyong dibdib.

Ingatan at pangalagaan din ang pinakamalambot na parte ng ulo ng iyong baby. Ito ay ang kaniyang bunbunan o fontanelles. Nag-dedevelop naman ang muscles sa leeg ni baby na susuporta sa kaniyang ulo sa ikaapat na buwan ng kaniyang buhay.

4. Pumili ng posisyon sa paghawak kay baby.

Samantala may mga posisyon na maaring pagpilian kung paano hawakan si baby. Ilan sa mga ito ay ginagawa upang makatulong sa maayos na pagpapasuso at pagpapadighay sa kaniya.

Mga posisyon kung paano hawakan ang sanggol

Cradle hold

Cradle hold, isang paraan kung paano hawakan ang sanggol.

Image from HealthLine

Ang cradle hold ay isa sa pinakamadali at pinakamagandang paraan kung paano hawakan ang sanggol lalo na ang mga newborn.

Mula sa tamang pagbuhat na may suporta sa kaniyang leeg at puwetan ay ihiga ng pahalang sa iyong braso si baby na malapit sa iyong dibdib. Dapat ang ulo niya ay nakapatong sa iyong braso samantalang ang puwetan niya ay sinasalo ng iyong kamay. Sa ganitong posisyon ay maari mong gamitin ang isa mo pang kamay bilang dagdag na suporta o kaya naman para makagawa ng iba pang bagay.

Ang cradle hold ay ang pinakamagandang paraan upang maayos na mapasuso ang isang sanggol.

Shoulder hold

Sholder hold, isang paraan kung paano hawakan ang sanggol.

Image from HealthLine

Buhatin si baby pataas sa iyong balikat. Siguraduhing nakasuporta ang isa mong kamay sa kaniyang leeg at ulo at ang isa naman ay sa kaniyang puwetan. Maari mo ring ipwesto ang kaniyang ulo sa iyong dibdib upang marinig niya ang iyong heartbeat.

Belly hold

Belly hold, isang paraan kung paano hawakan ang sanggol.

Image from HealthLine

Ihiga ang iyong baby na nakadapa sa iyong braso. Ang ulo niya ay dapat nakahiga sa iyong braso pahalang na kung saan ang kaniyang bewang pababa ay sinasalo ng iyong kamay.

Ang belly hold ay makakatulong sa mga baby upang makadighay. Dahan-dahan lang ding tapikin o hilutin ang kaniyang likod upang tulungan siyan mailabas ang gas o hangin sa kaniyang tiyan.

Lap hold

Lap hold, isang paraan kung paano hawakan ang sanggol.

Image from HealthLine

Umupo sa isang upuan at pagdikitin ang dalawa mong binti. Ihiga ang iyong baby sa iyong lap o kandungan na nakaharap sa iyo. Ang iyong dalawang kamay ay dapat sinasalo ang kaniyang ulo samantalang ang iyong braso ay nasa ilalim ng kaniyang katawan at ang mga paa ni baby ay dapat nakaipit sa iyong bewang.

Dagdag tips kung paano hawakan ang sanggol

  • Kung sakaling si baby ay umiiyak o irritable habang siya ay hawak mo, palitan ang kaniyang posisyon na kung saan siya magiging komportable.
  • Ang pagbibigay rin ng mahinang “shushing” sound ay makakatulong sa pagpapakalma sa baby. Dahil ang white noise na ito ay tulad ng tunog sa sinapupunan ng isang babae na naging tahanan ni baby noong hindi pa siya isinisilang.
  • Ang paghehele o dahan-dahang pag-ugoy kay baby rin ay makakatulong para pakalmahin siya. Huwag lamang itong ishashake o yuyugyugin dahil ito ay makakapagdulot ng pagdurugo sa kaniyang utak na maaring makasama sa kaniya o maging dahilan ng kamatayan.
  • Kung sakali namang gustong magkarga ng baby ngunit hindi komportable sa pagbuhat sa kaniya ay maaring maupo muna sa isang upuan o couch at dahan-dahang ipalipat ang sanggol sa iyong braso.
  • Iwasan ding humawak ng matatalim o maiinit na bagay habang hawak si baby upang makaiwas sa anumang aksidente na maaring magpahamak sa kaniya,
  • Kung aakyat sa hagdan, ugaliing laging nakahawak ang dalawa mong kamay kay baby bilang dagdag suporta sa kaniya.

Walang tama o maling posisyon sa paghawak sa sanggol basta siguraduhin lang na may suporta ang kaniyang ulo at leeg na napaka-sensitive at delicate pa lalo na sa mga newborn.

 

Sources: Mens Health, HealthLine

Basahin: 7 Tips sa pagpapaligo kay baby

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!