Trangkaso, ubo, at sipon. Ito ang kadalasang sakit na nararanasan ng marami sa atin ngayon. Ayon sa Department of Health, dito sa Pilipinas ay mas maaring dumami ngayon ang Pilipinong nagkatrangkaso kumpara ng nakaraang taon.
Kaso ng trangkaso, ubo at sipon sa Pilipinas
Base sa datos na nakalap ng Department of Health o DOH, ay may naitalang 179,227 na Pilipino ang nagkatrangkaso noong 2024. Ngayong pagpasok ng taong 2025 ay nadagdagan pa ang kaso ng trangkaso dito sa bansa. Ang itinuturong dahilan ay ang malamig na panahon.
Ang trangkaso o flu sa salitang Ingles ay impeksyon sa ilong, lalamunan at baga ng isang tao. Kilala rin ito sa tawag na influenza na dulot ng isang virus. Dito sa bansa may apat na uri ng viruses ang nagdudulot ng trangkaso. Ito ay ang rhinovirus enterovirus, influenza respiratory synsitial virus (RSV) at adenovirus. Ang pagkalat ng virus mas pinapabilis ng malamig na panahon na siyang nagtritrigger rin ng ubo at sipon.
Payo ng DOH para makaiwas sa trangkaso, ubo at sipon
Ayon kay DOH Assistant Secretary Albert Domingo may ilang hakbang na dapat gawin upang maiwasan pa ang pagkalat ng nakakahawang sakit.
“Isagawa ang respiratory etiquette tulad ng pagtatakip sa ubo gamit ang siko; pananatili sa bahay kapag may ubo, sipon o lagnat; at madalas na paghuhugas ng kamay gamit ang sabon at tubig habang nagpapatuloy ang mas malamig na Northeast Monsoon, o panahon ng Amihan.”
Ito ang payo ni ASec Domingo.
Dagdag pa niya, dapat ay kumain rin ng masusustansyang pagkain. Malaking tulong rin ang pag-eehersiyo para mas lumakas ang immunity ng katawan. Pati na ang pagiging dehydrated o pag-inom ng sapat na dami ng tubig araw-araw.
“Mag-ingat sa pamamagitan ng madalas na paghuhugas ng kamay, pag-iwas sa matataong lugar kung maari at pagkain at pag-inom ng tubig ng maayos.”
Ito ang payo pa ni ASec Domingo para makaiwas sa virus na nagdudulot ng trangkaso, ubo at sipon.
May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!
