Glaiza De Castro muling ikinasal sa Irish husband na si David Rainey

Masayang-masaya sa mga larawang iniupload sa social media si Glaiza De Castro. Ito ay matapos na muling ikasal sa kaniyang asawang si David Rainey.

Mababasa sa artikulong ito:

• 2^nd wedding ni Glaiza De Castro dinaluhan ng mga celebrity
• Mga kaibigan todo suporta sa kasal ng aktres

2^nd wedding ni Glaiza De Castro dinaluhan ng mga celebrity

Sa ikalawang pagkakataon ay ikinasal sina Glaiza De Castro ang kaniyang Irish husband na si David Rainey. Matatandaang naganap ang unang kasal nito sa intimate Celtic ceremony by mountain cliff noong October 2021 sa Northern Ireland, United Kingdom.

Ngayong Enero 2023 naman ay muling ikinasal ang dalawa dito naman sa Pilipinas. Sa Zambales ginanap ang kasal ni Glaiza De Castro na ang tema ay Filipiniana.

Ang celebrity friends ni Glaiza De Castro na sina Isabel Oli, Sheena Halili, Chynna Ortaleza, at Rochelle Pangilinan ang nagsilbing bride’s maid sa naganap na kasal. Habang si Angelica Panganiban naman ang kaniyang Maid of Honor.

Dinaluhan din ng iba pang naggagandahan at nagugwapuhang mga artista sa kanilang Filipiniana at Barong ang nasabing kasalan.

Sa mga larawang ini-upload ng Nice Print Photography, makikitang dumalo sa kasalan sina Kean Cipriano, Maxene Magalona, Tracy Garcia, at Joy Marcelo.

Gayundin ang mga kasama ni Glaiza De Castro sa Running Man Ph na sina Kokoy De Santos, Lexi Gonzales, Buboy Villar, Mikael Daez, at Angel Guardian. Kasama rin si Ruru Madrid na ang ka-date ay ang kaniyang girlfriend na si Bianca Umali.

Sa isang episode ng Bright Side, ibinahagi noon ng aktres kung paano nagsimula ang kanilang pag-iibigan ng Irish husband.

2018 daw nang pumunta si Glaiza sa Siargao para sa kaniyang birthday celebration.

“Tapos one night, may tumutugtog na isang kanta na sobrang favorite ko. Hinanap ko kung sino ‘yong nagpapatugtog, apparently siya pala ‘yon. Nag-usap na kami,” kuwento ni Glaiza.

At nang kinailangan na raw bumalik ni David sa Ireland, nagpatuloy pa rin ang komunikasyon ng dalawa. Tuloy-tuloy rin ang panliligaw ng lalaki sa aktres sa pamamagitan ng pagpapadala ng mga regalo at love letters.

September 2018 nang naging official na ang relationship ng dalawa. Ipinakilala ng ani David sa pamilya niya si Glaiza noong February 2019 sa naganap na birthday celebration ni David at ng kakambal nito sa England.

Noong June 2019 naman ay nagtungo si Glaiza sa London para mag-aral ng kursong music production at dito na nga nagkaroon ang dalawa ng mas maraming quality time nang magkasama.

Mga kaibigan todo suporta sa kasal ng aktres

Bago ang kasal ni Glaiza De Castro, kaliwa’t kanang bridal shower ang sumorpresa rito mula sa iba’t ibang group of friends nito.

Sa magkakahiwalay na Instagram post ay ipinaskil ng aktres ang mga larawan ng pakulo ng kaniyang mga kaibigan.

Noong January 5 ay ibinahagi ni Glaiza ang video ng bridal shower na inihanda ng kaniyang kaibigan na si Vanessa Gatan.

Aniya, “Wala talaga akong ka idea idea kasi naman kala ko mag bonding lang kami ni @farfalla214. Pero ang saya kasing makita ulit kaming magkakasama. Dati kwarto at cafe lang ang bonding natin. Ngayon kung saan-saan na tayo nakakarating. Pero hindi p arin tayo mawawala sa mga mahahalagang moments ng isa’t isa.”

Nang mga oras na iyon ay hindi rin daw makapaniwala si Glaiza na ilang araw na lang ay ikakasal na siya.

“Sobrang na appreciate at chini cherish ko ‘yong mga ganitong moments dahil oras ang pinakamainam na maibibigay mo sa tao kaya salamat mga sis,” pahayag ng aktres.

Larawan mula sa Instagram ni Glaiza De Castro

Sa isa pang Instagram post ay ibinahagi ni Glaiza ang isa na namang bridal shower na sorpresa naman nina Angelica Panganiban sa kaniya. Sabi ng aktres, ang red dress na suot niya sa mga larawan ay dinala lang ni Angelica. Para may pamalit siya dahil hindi makapagbihis ng akma sa okasyon dahil wala siyang ka-ide-ideya sa mga magaganap.

“Yong akala ko may viewing ng condo pero iba pala ang ma vu-view ko. Grabe ‘yong pagmamahal na naramdaman ko kagabi kaya maraming salamat sa lahat ng bumubuo ng #HappypeCHAy” saad ni Glaiza sa IG post.

January 19 naman naganap ang ikatlong bridal shower para kay Glaiza. Ito naman ay inihanda nina Rochelle Pangilinan, Isabel Oli, Sheena Halili, at Chynna Ortaleza—na sila ring mga bride’s maid sa kasal ng aktres.

“Okay, so this time napag handaan ko ang bridal shower. Bilang ito lang talaga yung naka schedule sakin. Pero hindi ko pa rin alam kung anong magaganap so feeling ko medyo napasobra naman ata yung outfit ko this time?” saad ng aktres.

Nagpasalamat din ito sa pagmamahal ng kaniyang mga kaibigan at pamilya.

“Lord, salamat sa pamilya lalo na sa mga kaibigang binigay mo sa akin. Hindi sila madaling makita. Sa mga naging abala sa payugyog na ito, salamat ng marami at mahal na mahal ko kayo.”