Bakit nagkakaroon ng sakang na paa ang bata?

Bakit nagkakaroon ng sakang na paa ang bata?

Nababahala ka ba sa sakang na paa ng baby mo? Alamin dito kung bakit nga ba ito nangyayari at kung may lunas ba para dito.

Lima’t kalahating buwang gulang na ang anak kong babae. Mula nang ipanganak siya, hindi matawaran ang sigla niya. Parating kumakawag-kawag ang mga paa niya. Mabilis din siyang natutong umikot sa kama. Sa murang edad, gusto na niyang sumubok na tumayo nang may gabay! Siya na ata ang pinakamalikot na baby na nakita ko.

Dahil panganay, tuwang-tuwa kami sa lahat nang gawin niya at hinahayaan siyang gawin ang mga hilig niya. Ngunit isang araw, napansin namin na mayro’n siyang sakang na paa. Nakakita na ako ng mga batang sakang kaya nag-worry kami na baka maging ganito rin siya.

Sa sumunod na check-up sa pediatrician ni baby, tinanong namin kung bakit nagkakaganito ang mga binti ng anak namin. Siniguro sa amin ng duktor na normal na nagkakaroon ng sakang na paa ang mga sanggol. Dahil daw ito sa masikip lugar nila ginagalawan nila habang nasa sinapupunan pa sila.

Ano ang sanhi ng pagka-sakang?

Naranasan mo rin ba ito sa iyong supling? Malamang nabahala ka rin sa pagka-sakang ng iyong anak. Kaya naman minabuti namin na mag-saliksik tungkol dito—kung paano ito nangyayari, at paano ito maisasaayos.

Sa mga pag-aaral, sinasabi na habang nagde-develop ang baby sa loob ng sinapupunan, nakatupi ang mga binti nito at tila niyayakap ang sarili. Ito ang tinatawag na fetal position. Kapag pinanganak sila, gusto pa rin nila ang posisyon na ito na nakasanayan nila sa loob ng tiyan ni mommy ng 9 na buwan. Kaya nga’t gustung-gusto nila na naka-swaddle pa rin sila.

Sa mga unang buwan, hindi ka-pansin-pansin ang pagkakaroon ng sakang na paa o bow legs ng bata dahil hindi pa mabigat ang baby at hindi pa nito ginagamit ang mga hita. Nagsisimula pa lang mag-develop ang mga buto.

Di tulad ng buto ng matanda na nalalagyan ng calcium—tinatawag na ossification ng buto—ang buto ng baby ay hindi lubos na ossified. Dahil dito, hindi gaanong matibay ang buto ng bata.

Kaya naman madaling kumurba ang buto kapag may constant pressure. Sa madaling salita, kumukurba ang buto sa binti dahil sa bigat ng bata na kailangan nitong suportahan. Nangyayari ito kapag nagsisimula nang tumayo, maglakad, at kinalaunan ay tumakbo ang bata. Normal ito na nangyayari at tinatawag itong genu varum. Nawawala naman ang pagka-sakang paglaki ng bata.

Paano malalaman kung normal ang pagka-sakang ng bata? Narito ang ilang characteristics ng normal na bow legs:

  • Pantay ang kurba ng mga binti
  • Hindi mukhang mas mahaba ang isang binti
  • Nawawala ang pagka-sakang kapag bandang 3 taong gulang na ang bata.

Ano ang puwedeng mangyari?

sakang na paa

Normal, sakang, at piki. | Photo: Shutterstock

Pag sapit ng tatlong taon, nagsisimula nang bumalik ang buto sa normal na posisyon nito. Nawawala na ang sakang na paa ng bata, kung mayroon man siya nito. Subalit, sa ibang pagkakataon, nagiging piki naman ang bata o ang tinatawag na knocked-knees, kung saan nagiging baligtad ang kurba ng mga buto.

Kagaya ng pagkasakang, normal din ang pagka-piki ng bata sa edad na tatlo hanggang limang taong gulang. Ang pagka-piki ay tinatawag na genu valgum at karaniwang nawawala pagdating ng walong taong gulang.

Mga sakit

Sa karamihan ng kaso, normal ang pagkakaroon ng sakang na paa, ngunit may pagkakataon ding dapat kumunsulta na sa duktor dahil baka sintomas na ito ng karamdaman. Ang pinakakaraniwang sakit ay ang Rickets at Blount’s disease.

Blount’s Disease

Ang sakit na ito ay sanhi na abnormal na tubo ng buto sa binti, ang tibia. Hindi pa alam kung paano nagkakaroon ng ganitong sakit ngunit pinagaalala na may kinalaman ito sa genetics (namamana). May kinalaman din daw ito sa childhood obesity at maagang paglalakad. Puwedeng tamaan ang isa o parehong binti.

Kapag bata pa, hindi pa puwedeng makilala kung normal na pagkasakang lamang o Blount’s disease na. Mas mada-diagnose lamang ito ng tama kapag tatlo o apat na taon na ang bata at sakang pa rin.

Rickets

Ang Rickets naman ay dulot ng kakulangan ng Vitamin D na nakukuha sa exposure sa araw. Mahalaga ang bitamina na ito sa calcium metabolism na nagbibigay ng calcium sa mga buto at ngipin. Kaya naman kapag kulang sa bitaminang ito, naaapektuhan ang pagiging matibay ng buto ng bata kaya naman nagiging sakang ito.

Karaniwang naaapektuhan ng Rickets ang mga breastfed babies at mga bata na may ganitong katangian:

  • Kayumanggi ang balat
  • Hindi gaano nakakalabas sa araw
  • May sakit na nakaka-apekto sa pag-produce ng Vitamin D
  • May coeliac disease na humahadlang sa vitamin D metabolism

Kailan dapat mabahala?

Para sa isang bagong magulang, nakakabahala na makita ang sakang na paa sa sanggol. Para makasiguro na hindi siya magkaroon ng ganitong kundisyon, siguraduhing huwag siyang madaliin na maglakad!

Bukod pa dito, siguraduhin na:

  • Napapaarawan parati ang bata
  • Healthy ang kinakain
  • Bantayan ang timbang ng baby at tignan kung nagiging overweight na ito

Ang mga red flags na kailangan nang ipatingin sa espesyalista ang bata:

  • Kung nakakasagabal na sa paglalakad ang pagkasakang
  • Kung sakang pa rin kapag tatlong taong gulang na
  • Kung hindi makatayo ng maayos dahil sa sakit
  • Kung isang binti lang ang apektado ng pagkasakang
  • Kung maliit ang bata para sa edad niya

Kung hindi makitaan ng red flags ang bata, huwag nang mag-alala mga mommies at daddies. Normal lang ang sakang na paa sa mga bata at malalampasan niya rin ito. Ngunit kung talagang lubos na nababahala dahil dito, huwag mag-atubili na kumonsulta sa duktor.

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!

Sinulat ni

Anay Bhalerao

Article Stories
app info
get app banner