Ectopic pregnancy: Sanhi, sintomas, at lunas

Ano-ano nga ba ang mga sintomas ne ectopic pregnancy at ano ang peligrong maaring maidulot nito sa mga kababaihan?

Isa ang ectopic pregnancy sa mga kondisyon na nararanasan ng mga babae pagdating sa pagbubuntis. Ito ay isang abnormalidad na kung saan ang fetus ay nabuo sa labas ng matres imbis na sa loob nito. Ang matres o ang uterus lamang ang nagsisilbing bahay-bata sa pagbubuntis. Kaya naman ang pagbubuntis sa labas nito ay maituturing na unsuccessful pregnancy na may kaakibat na peligro sa babaeng nagdadala nito.

Ayon sa American Academy of Family Physicians (AAFP), isa sa 50 pregnancies o 20 sa 1,000 na pagbubuntis ang maaring maging ectopic. Bagamat makikita sa pamamagitan ng pregnancy test na positibo sa pagdadalang-tao ang isang babae hindi parin ito nagbibigay kasiguraduhan na ang pinagbubuntis niya ay nasa tama nitong kinanalagyan at hindi isang kaso ng ectopic pregnancy.

Sintomas ng ectopic pregnancy

Isa sa pangkaraniwang uri ng ectopic pregnancy ay ang pagkabuo ng fetus sa fallopian tube o sa lagusan ng itlog na mas kilala rin sa tawag na tubal pregnancy. Nangyayari ito kapag ang fertilized na itlog o egg cell ay nanatili sa fallopian tube imbis na bumaba sa matres ng isang babae upang doon ma-develop at maging isang sanggol.

Sa una, ang ectopic pregnancy ay tulad rin ng normal na pagbubuntis. Ngunit habang tumatagal at lumalaki na ang fetus ay makakaramdam na ang babaeng nagbubuntis ng mga sintomas ng ectopic pregnancy. Ilan sa mga ito ay:

• Matinding pananakit sa balikat, leeg at isang parte ng tiyan.
• Makakaranas rin ang nagbubuntis ng pagdurugo mula sa mahina o spotting hanggang sa malakas o heavy bleeding.
• Makakaramdam rin ng pagkahilo o pagkahimatay ang isang babaeng nakararanas ng ectopic pregnancy.

Kung makakaramdam ng mga naturang sintomas ng ectopic pregnancy dapat ay kumonsulta agad sa iyong doctor o OB-Gyne.

Diagnosis ng ectopic pregnancy

Ang ectopic pregnancy ay hindi matutukoy ng simpleng physical examination lang.  Kailangang magsagawa ng transvaginal ultrasound o pagpasok ng isang instrumento sa inyong pwerta upang makita kung ang pinagbubuntis mo o ang gestational sac ay nasa labas o loob ng iyong matres.

Maari ding magsagawa ng blood test upang malaman ang dami ng hCG o progesterone hormones ng isang buntis. Kung ang dami nito ay nababawasan o hindi nagbabago sa paglipas ng ilang araw at wala paring nakikitang gestational sac sa iyong matres malinaw na palatandaan na ito at sintomas ng ectopic pregnancy.

Lunas o Gamot

Kung nakakaranas naman ng malalang sintomas na ng ectopic pregnancy tulad ng matinding pananakit at pagdurugo ay kailangan ng sumailalim sa surgery ng babaeng nagbubuntis. Ito na lamang ang paraan upang agad itong malunasan at maiwasan ang pagputok ng fallopian tube na maaring magdulot ng peligro sa buhay ng babaeng nagdadala nito.

Sanhi ng ectopic pregnancy

Ang mga sintomas ng ectopic pregnancy ay kadalasang nararanasan ng mga babaeng may sexually transmitted infection o impeksyon na nakukuha sa pamamagitan ng pagtatalik tulad ng gonorrhea o chlamydia na nagdudulot ng pamamaga sa fallopian tubes at iba pang organs sa paligid nito.

Kadalasan ding nangyayari ito sa mga babaeng gumagamit ng mga fertilization methods o ang makabagong paraan upang mabuntis tulad ng in vitro fertilization o (IVF). Mas malaki rin ang posibilidad na makaranas ng ectopic pregnancy ang mga babaeng dumaan sa tubal surgery at sa mga babaeng nakaranas narin ng ectopic pregnancy noon.

Bagamat pinipigilan dapat nito ang posibilidad ng pagbubuntis, ang paggamit ng IUD o intrauterine device ay maaring maging sanhi ng ectopic pregnancy lalo na’t ang pagbubuntis ay hindi inaasahan.

Isang tinuturong dahilan din ng ectopic pregnancy ay ang paninigarilyo na mas nagpapataas ng tyansa nito.

Prevention?

Walang paraan upang maiwasan ang ectopic pregnancy ngunit may mga maari  kang gawin upang mapababa ang tiyansang makaranas nito.

Una ay ang pakikipagtalik sa isang tao lamang. Sumunod ang maingat na pakikipagtalik o safe sex tulad ng paggamit ng condom upang hindi makakuha ng mga sexually transmitted disease at iba pang impeksyon. At kung naninigarilyo, dapat ng tuluyang itigil ito kung nagplaplano ng mabuntis at bumuo ng pamilya.

Bagamat hindi matukoy ang early signs o sintomas ng ectopic pregnancy, hinihikayat ang bawat kababaihan na maging responsable sa kanilang katawan at ugaliin maging maingat sa pagtatalik. Makakatulong rin ang madalas na pagbabasa upang magkaroon ng dagdag na kaalaman at mabigyang linaw ang mga pagbabagong nararamdaman sa iyong katawan para makasiguradong ikaw ay malusog at walang karamdaman.

Sources: Healthline.com, Mayoclinic.org, webmd.com

Basahin:

Miscarriage symptoms: Everything you need to know about this

The 2 most common causes of miscarriage and how to avoid them

Isinulat ni Irish Manlapaz