Usap-usapan ngayon ang panukalang batas ni Senator Risa Hontiveros na tinatawag na Prevention of Adolescent Pregnancy Act of 2023. Isa sa mga layunin nito ay magtuturo ng sex education sa mga batang 10 taong gulang pataas. Habang marami ang sumusuporta, marami rin ang nag-aalala. Kaya, kinausap namin ang ilang magulang para malaman ang opinyon nila tungkol dito.
Ano ang sabi ng mga nanay sa panukalang sex education?
Para kay Grecyl Aguilar, 25 taong gulang at may anak na 1 taon gulang, ayos lang na ituro ang sex education sa paaralan. Pero nakadepende ito sa tamang paraan ng pagtuturo. “Depende na ito sa paraan ng pagtuturo at sa salitang gagamitin,” sabi niya.
Naniniwala siyang puwedeng maituro ang sex education nang hindi sinisira ang kulturang Kristiyano ng bansa. “May pagkakaiba ang edukasyon at pag-eengganyo. Basta may gabay ng magulang, magagamit ng bata nang tama ang natutunan,” dagdag niya.
Larawan mula sa Shutterstock
Mariin namang sinang-ayunan ni Mary Grace De Vera, 29 taong gulang, may anak na 3 taong gulang, ang panukala. “Dapat as early as 10 years old, ituro na ito. Iba na ang panahon ngayon. Ang mga bata, mabilis matuto dahil sa teknolohiya,” paliwanag niya. Dagdag pa niya, mahalaga ang papel ng mga magulang bilang “safe space” ng kanilang mga anak. “Kung maunawain tayo at nakikinig, mas magiging bukas ang mga anak na magbahagi ng nararamdaman nila,” aniya.
“Maiging imulat na sila sa ganitong usapin na naglalayon na ilayo sila sa kapahamakan. Gumawa ng mga proyekto at aktibidades na makakatulong sa kanilang personal growth and development upang maging kapaki-pakinabang sa bansa.”
Larawan mula sa Shutterstock
Samantala, para naman sa ina ng isang 6-anyos at isang 2-anyos na si Gigi Opleda, 26 taong gulang, hindi siya sang-ayon sa panukalang batas na ito.
Paliwanag niya, “Kapag ang bata ay nagkaroon ng ideya sa isang bagay na hindi pa niya nararanasan, mas lalo siyang nagiging interesado rito.”
Para sa kanya, mas mabuting mag-focus muna ang mga bata sa paglalaro at pagiging bata. “Ang tamang gabay mula sa magulang ang solusyon sa teenage pregnancy,” dagdag niya.
Bakit mahalaga ang Sex Education?
Ayon sa pag-aaral ng United Nations Population Fund (UNFPA), ang comprehensive sex education (CSE) ay nakatutulong hindi lang sa mga bata kundi pati na rin sa mga magulang at lipunan. Narito ang ilan sa mga benepisyo nito:
- Kaalaman sa sarili – Natututo ang mga bata tungkol sa kanilang katawan, emosyon, at kung paano magdesisyon nang tama.
- Pag-iwas sa Teenage Pregnancy – Ayon sa Philippine Statistics Authority, isa sa limang kababaihan edad 15-19 ay buntis o may anak na. Ang maagang pagbubuntis ay nagdudulot ng panganib sa kalusugan, edukasyon, at kabuhayan ng kabataan.
- Pagbuo ng mas responsableng lipunan – Ang mga kabataang may tamang kaalaman ay mas bihasa sa pagrespeto sa sarili at sa iba.
Ang epekto ng Teenage Pregnancy
Ang teenage pregnancy ay may malalim na epekto, lalo na sa mga kababaihan:
- Kalusugan – Mataas ang tiyansa ng komplikasyon sa pagbubuntis at panganganak.
- Edukasyon – Maraming batang ina ang napipilitang tumigil sa pag-aaral.
- Kahirapan – Ang maagang pagbubuntis ay kadalasang nagdudulot ng mas matagal na cycle ng kahirapan.
Larawan mula sa Shutterstock
Ano ang dapat tandaan ng mga magulang?
Sa huli, mahalaga ang papel ng mga magulang sa pagtuturo ng tamang aral sa kanilang mga anak. Sabi nga ni Mary Grace, “Kung tayo bilang magulang ay may takot sa Diyos at maunawain, mas magiging bukas ang mga anak sa atin.”
“Ang kultura at moralidad at pagiging Kristyano ay nasa sa ating mga magulang kung paano nila tayo nakikitang mabuting ehemplo hindi sa salita ngunit sa gawa,” dagdag pa ni mommy Grace.
“Sa karagdagan, sana magkaroon ng patuloy na libreng edukasyon at matulungan ang mga batang nasa lansangan. Nawa’y mabigyan ng mapagkakakitaan ang mga mahihirap na Pilipino dahil kung patuloy ang kahirapan sa bansa, magpapatuloy rin ang maagang pagbubuntis sa murang edad na malaking rason sa paulit-ulit na kahirapan.”
Isang balanse at praktikal na diskarte
Bagamat may mga tutol sa panukala, marami rin ang naniniwalang makabubuti ito kung gagawin sa tamang paraan. Ang tagumpay ng batas ay nakasalalay sa maayos na implementasyon at suporta ng bawat sektor ng lipunan. Sa dulo, ang tanong ay hindi kung dapat ba o hindi, kundi paano ito magagawa nang tama.
Handa na ba tayo bilang mga magulang na maging bahagi ng solusyon? Sa gabay at pagmamahal, sama-sama nating harapin ang mga hamon ng makabagong panahon.
Macayan, J. (2025, January 23). Personal communication [Email interview with parents regarding Senator Risa Hontiveros’ sex education bill].
Philippine Statistics Authority. (n.d.). Teenage pregnancy statistics in the Philippines. Retrieved from https://psa.gov.ph
Senate of the Philippines. (2025). Senate Bill No. 4108237439: Comprehensive sex education act. Retrieved from https://web.senate.gov.ph/lisdata/4108237439!.pdf
United Nations Population Fund. (n.d.). Comprehensive sexuality education: Benefits and implementation. Retrieved from https://www.unfpa.org
May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!
