May Colic si baby: Mga dapat malaman ni mommy at daddy

Share this article with other moms

Narito ang mga sintomas, sanhi at tips para kay Mommy at Daddy kapag nagkaroon ng colic si baby

Kapag nagsimula nang umiyak si baby nang walang humpay, hindi mo na alam ang gagawin. Dagdag pa ang pag-aalala para sa anak, dahil nga hindi alam kung may masakit ba sa kaniya. Stressed na si baby, stressed din si Mommy at Daddy. Bakit nga ba nag-iiiyak ang bata nang ganito?

Maaaring colic ito.

Ano ang Colic?

Lahat ng bata ay umiiyak. Minsan lambing nila ito sa mga nag-aalaga, madalas ito ang paraan nila para masabi ang pangangailangan nila tulad ng gutom, at para masabing may masakit silang nararamdaman.

Bilang mga magulang, hindi tayo nag-aatubiling matugunan ang mga pag-iyak na ito. Pag-Colic na ang nararamdaman, labis ang pag-iyak at walang tigil, nang wala namang dahilang nakikita ang mga nag-aalaga.

Ito ay tinuturing na colic kung umaabot ng 3 oras at nangyayari ng hanggang 3 beses sa isang linggo, sa loob ng tatlong linggong sunud-sunod.

Huwag mag-alala: ang colic ay hindi nagtatagal. Madalas ay umaabot ng hanggang 6 na linggo na humuhupa din sa ika-10ng linggo. Madalas ay sa ikatlong buwan, titigil na lang ito nang walang babala, ayon kay nurse Len Paniza, RN.

photo: dreamstime

Mga sintomas

Paano malalaman kung colic nga ang bumabagabag kay baby? Ito ang ilan sa mga sintomas.

  • Umiiyak ng halos parehong oras araw-araw, madalas sa hapon o pagabi pa lamang.
  • Karaniwang nakataas ang mga binti at paa at sumisipa at nakatikom ang kamay na parang pasuntok.
  • Madalas nakapikit o di kaya nama’y dilat na dilat ang mga mata, nakakunot ang noo at pinipigil ang paghinga minsan.
  • Madalas ang pagdumi kaysa karaniwan, kinakabag o naglulungad.
  • Hindi tuluy-tuloy ang pagtulog at pagkain, dahil sa biglang pag-iyak ng malakas.

Ano ang pagkakaiba ng colic at karaniwang pag-iyak?

Walang malinaw na depinisyon kung ano ang colic. Ngunit ayon sa mga espesyalista, ang pagkakaiba ng colic sa ordinaryong pag-iyak lamang ay ang labis na pag-iyak na hindi mapatahan.

Tumatagal ito ng halos 3 oras na tuluy-tuloy. Araw-araw at gabi-gabi ito nangyayari, kaya’t pati ang magulang na nag-aalaga ay pagod at puyat.

Mga sanhi

Wala ring alam na sanhi nito. Ang sigurado lang ng mga doktor ay hindi ito namamana o genetic, at hindi ito pagkukulang ng mga magulang ng bata.

Ayon sa aklat na Management of Infantile Colic: A Review nina J. Cohen-Silver at S. Ratnapalan, ito ang mga tinitingnang mga posibleng sanhi ng colic:

Overstimulated senses. Maaaring sensitibo ang sanggol sa kaniyang kapaligiran, at naaapektuhan siya ng kahit maliit lamang na ingay o bagay na nakikita niya. Sa dami ng naririnig o nakikita, nakaka-stress ito para sa isang sanggol, kaya’t hindi na siya mapakali.

Hindi pa handa ang digestive system ng sanggol. Maaaring may kinalaman din ito sa panunaw ng pagkain ng bata, kaya’t sumasakit at nagkakaron ng gas o kabag sa tiyan.

Infant acid reflux. Sinasabi na ang infant GERD (gastroesophageal reflux disease) ay maaaring dahilan ng colic. Sintomas ng infant GERD ang madalas na paglungad o kaunting pagsuka, walang ganang kumain, at pagka-iritable at pagka- bugnutin bago at pagkatapos kumain. Ang kabutihan lang ay nawawala din ito pagdating ng isang taon ng bata. Ang colic ay karaniwang nawawala ng mas maaga pa dito.

Food allergies o pagiging sensitibo sa mga kinakain. Ayon sa mga pagsasaliksik, ang colic ay dahil sa allergy sa milk protein (o lactose intolerance) sa mga batang formula-fed. Maaari ding reaksiyon ito sa mga kinain ni Mommy, na napupunta sa gatas na pinapasuso sa anak. Ang mga allergies o pagka-sensitibong ito ay maaaring pagsimulan ng colic.

Sigarilyo o tobacco. Maraming pag-aaral na ang nagpatunay na ang mga inang nanigarilyo habang nagbubuntis o pagkatapos magbuntis ay may masamang epekto sa dinadalang bata, isa na dito ang pagiging colicky ng bata. Walang tahasang patunay dito, ngunit maraming patunay na masama ang paninigarilyo sa mga nagbubuntis dahil sa epekto nito sa sanggol sa sinapupunan.

photo: shutterstock

Remedyo para sa colic

Mahirap man, kailangang iwasang magpatalo sa pagod at paninisi sa sarili ang mga magulang, habang pinapatahan ang bata. Subukan ang mga sumusunod na stratehiya para matulungang kumalma si baby.

1. Hawakan, kargahin o yakapin. Wala nang hihigit pa sa haplos ng magulang na nagmamahal sa anak. Umiiyak ang bata dahil may kailangan siya na hindi niya masabi, kaya’t ang unang solusyon ay bigyan siya ng kaukulang pansin.

Malaki ang tulong nang maagap na pagbibigay pansin sa pag-iyak ng sanggol. Hawakan, at yakapin, kausapin o kantahan pa, para makatulong na kumalma ang iritableng bata. Ang iyong haplos at kalinga ang nagsasabi kay baby na lahat ay magiging okay.

2. Iwasan ang kapaligirang nakaka-stress at nakaka-overstimulate sa bata. Hangga’t maaari, huwag nang tumanggap ng bisita o maraming tao sa hapon hanggang pagabi na. Pagmasdan ano ang nakakapag-overstimulate sa bata: malakas na TV, maraming taong nagkukuwentuhan, malakas na tugtog o musika, at iba pa.

3. Bigyan siya ng mapayapa at kalmadong kapaligiran. Kapag oras na ng tulog, diliman ang ilaw, panatilihing tahimik ang kapaligiran, magpatugtog ng mahinang musika na nakakapagpakalma o relaxing, at magsalita ng mahina o pabulong pa nga.

4. Kung sa tingin mo ay gastrointestinal ang problema, pagmasdan at kapain ang tiyan ni baby. May ibang bata na napapakalma kapag hinahawakan o tinatapik ng mahina ang tiyan o abdomen. Bigyan din ang bata ng “tummy time”, o idapa ang sanggol. Pwede ring kargahin ang bata ng patayo para nakadiin ang tiyan sa iyong dibdib.

5. Kung ikaw ay nagpapasuso, ikunsulta sa doktor kung ano ang mga pagkaing dapat iwasan. May mga pagkain kasing mas nakakapagpalala sa kabag at gas kay baby (at kay Mommy na rin) tulad ng cabbage at cauliflower, mga prutas nna acidic at citrus, at mga pagkain allergenic tulad ng dairy, soy, wheat, itlog, mani at iba pang nuts, at isda.

6. Baka kailangang magpalit ng gatas (formula). May mga formula milk hindi talaga kasundo ng tiyan ni baby, kaya’t maiging itanong sa pediatrician kung ano ang gatas na hindi makakapagpalala sa problema sa tiyan ni baby. May mga pag-aaral na nagsasabing ang mga hypoallergenic na whey-hydrolyzed formula ay nakakatulong sa mga sintomas ng colic sa ibang sanggol. Magtanong sa pediatrician bago magpalit ng gatas para kay baby.

photo: dreamstime

7. Subukan ang swaddling. Ibalot siya sa mainit-init na kumot (ilagay sa dryer o di kaya’y plantsahin nang kaunti) at ibalot kay baby. Nakakatulong nag mainit-init (huwag masyado) na pakiramdam sa pagpapakalma sa kaniya.

8. Magpaingay ng mga bagay na nakakapagpakalma tulad ng mahinang tunog ng vacuum cleaner o ng washing machine at dryer, bentilador o umaandar na kotse. Maraming nakasubok na na ang mga tinatawag na “white noise” na ito ay nakakapagpakalma sa iritableng bata, o nakakapagaptulog sa batang di makatulog.

9. Magpatugtog ng soothing music. Nakakatulong ang mga lullaby, piano music, at classical music na sadyang para sa mga sanggol. May iba namang gumagamit ng mga tunog ng nature. Marami ka nang mahahanap sa YouTube nito. May mga MP3 din na pwedeng ma-download. Ihele ang bata habang binubulungan ng "shh" o “ahh”.

10. Bigyan siya ng pacifier. May ibang kailangan lang ng may nakasubo, dahil hinahanap hanap ang “sucking” o pagsuso, ngunit hindi naman gutom. Itanong sa doktor kung may maipapayong uri ng pacifier.

11. Ilabas si baby. Minsan maiba lang ang kapaligiran niya, makasagap lang ng sariwang hangin ay okay na para kay baby. Ilakad siya sa labas sakay ng stroller, o nang naka-sling sa iyo. Subukan ding isakay sa kotse at magmaneho sa paligid lamang ng bahay o subdivision, kung saan pwedeng mabagal ang takbo at walang maraming sasakyan.

Kumunsulta sa doktor

Tandaan na hindi maaaring magbigay ng kahit anong gamot nang walang pahintulot ng doktor. Gayundin kung may ipapakain na bago at hindi pa nasusubukan.

Itanong din sa doktor kung epektibo nga ba para sa anak ang gripe water, isang natural na remedyo sa colic gawa sa herbs at sodium bicarbonate. Marami ang gumagamit nito, sa payo na rin nang kanilang doktor dahil daw epektibo nga ito sa colic. Ikunsulta sa doktor at humingi ng paliwanag sa kabutihan o panganib nito. Tandaan din na hindi lahat ng natural at organic ay mabuti kay baby.

Para kay Mommy at Daddy

Huwag subukang solusyunan ang pag-iyak ng mag-isa, o nang walang ibang tulong. Walang masama na humingi ng tulong o payo sa ibang tao, lalo kung nararamdaman na ang labis na pagkapagod at frustration. Mas mapapasama pa kasi kung pipilitin mong alagaan o patahanin si baby kahit na pagod na pagod ka na. Makipagsalitan ng pag-aalaga, kumain at uminom nang mabuti, at magpahinga din.

sources: Cohen-Silver, J., and S. Ratnapalan. "Management of Infantile Colic: A Review." Clinical Pediatrics 48.1 Jan. 2009: 14-17. Wessel, M.A., J.C. Cobb, E.B. Jackson, et al. "Paroxysmal Fussing in Infancy, Sometimes Called Colic." Pediatrics 14.5 (1954): 421-435.

BASAHIN: Mga karaniwang sakit ng baby sa kanyang unang taon

Baby Health Baby Ages + Stages