#AskDok: May nararamdaman akong pananakit sa bandang puson, dapat ba akong mag-alala?

#AskDok: May nararamdaman akong pananakit sa bandang puson, dapat ba akong mag-alala?

Pananakit ng puson habang buntis—bagama't hindi dapat lubhang ikabahala, kailan nga ba ito peligroso para sa kaligtasan ng baby sa loob ng sinapupunan?

Ang anumang pagkirot o pananakit ng puson habang buntis ay tiyak na nakapagdudulot sa ina ng pag-aalala para sa kaligtasan ng baby sa loob ng kaniyang sinapupunan. Bagama’t nakapagpapa-panic, walang dapat na ikabahala sa mga bahagya lamang na pananakit ng puson habang buntis, ayon kay dok.

Dito sa theAsianparent Philippines ay mahalaga sa amin ang makapagbigay ng impormasyon na wasto, makabuluhan, at napapanahon, ngunit, hindi ito dapat gawing pamalit sa payo ng doktor, o kaya sa medical treatment. Walang pinanghahawakang responsibilidad ang theAsianparent Philippines sa mga nagnanais na uminom ng gamot base sa impormasyon sa aming website. Kung mayroong agam-agam, ay nirerekomenda naming magpakonsulta sa doktor upang makakuha ng mas malinaw na impormasyon.

Maraming pagbabago ang pinagdaraanan ng isang ina mula umpisa hanggang sa huling bahagi ng kaniyang pagbubuntis. Kabilang dito ang pagbabago sa dami ng iba’t ibang uri ng hormones na may kinalaman sa kaniyang pagdadalang-tao, pisikal niyang pangangatawan, pag-adjust nang unti-unting paglaki at paghulma ng iba’t ibang bahagi ng katawan lalo na ang kaniyang tiyan at mga organo sa loob nito, gayundin, ang emosyonal, mental, at iba pang pisyolohikal na aspeto ng tuloy-tuloy na pagbabago sa kaniyang katawan.

Bagama’t kaakibat ng mga pagbabagong ito ang iba’t ibang sintomas na mararanasan ng iyong katawan, halimbawa na ang pananakit ng puson, higit na kailangan pa rin ang pag-iingat. Upang makatiyak na ang ilang mga pananakit na nararamdaman at pagbabagong nararanasan ay normal pa rin at walang kaakibat na peligro.

Ano ang mga posibleng sanhi ng pananakit ng puson habang buntis?

Ayon kay Dr. Maria Carla Esquivias-Chua, aktibong ob-gyn consultant ng Capitol Medical Center, ang pananakit ng puson habang buntis ay maraming posibleng sanhi batay sa paraan ng pangangalaga ng buntis sa kaniyang katawan.

“Kung maliit pa ang pregnancy, puwedeng UTI (o urinary tract infection). Puwede rin namang threatened abortion, ‘yung makunan siya. So, inu-ultrasound naming usually ang buntis at ipinapa-laboratory,” pahayag ni dok.

“Kapag may nakitang UTI, gagamutin ang infection by antibiotics. Kapag naman may hemorrhage—subchorionic hemorrhage—na nakikita by ultrasound, binibigyann naming ng pampakapit. Also, ina-advise naming ‘yung pregnant patient na mag-bed rest,” pagpapatuloy ni Dr. Esquivias-Chua.

Kaya mahalagang nagiging mapanuri ang buntis sa kaniyang mga nararamdaman sa katawan. Ang mga bahagyang pananakit ay hindi dapat ipag-alala. Ngunit tagubilin ni dok, may mga warning sign o senyales na dapat bigyan ng agarang pansin ng buntis kaugnay ng pananakit ng puson.

Humingi ng agarang atensiyong medikal kung ang pananakit ng puson habang buntis ay:

  • May kasama nang spotting o ang bahagyang pagdurugong nagmumula sa ari ng babae;
  • Matindi at hindi na kayang indahin ng buntis, maski pa ipinahinga na ang katawan; at
  • May kasama nang paglalagnat, na maaaring tuloy-tuloy o pana-panahong pag-atake lamang.

Siyempre, ayaw nating humantong sa hindi magandang pangyayari ang anumang karamdamang iindahin ng isang buntis. Pagkat ang lahat ng ito ay nagsisimula sa bahagya at manaka-nakang pag-atake lamang, kaialngang maging alerto ang buntis kung nagkakaroon ng paglala sa mga nararamdaman.

“Iyong kamuntik nang makunan, na hindi pinansin? So, lumakas ang pagdurugo, tuloy ay nagtuloy-tuloy na nakunan. Saka, hindi nagamot ‘yung infection? Ang infection kasi, puwedeng mag-cause ng pagka-terminate. So, pag hindi naagapan ‘yung paggamot sa buntis, puwede siyang makunan. Ayaw natin ‘yon,” ang huling paalala ni Dr. Esquivias-Chua.

Mga paraan para upang makaiwas dito

Anumang nararamdamang hindi maganda ng mga buntis ay maaari namang iwasan upang hindi na maranasan pa. Upang mapanatag ang sarili mula sa pangambang idinudulot ng mga nararanasang pananakit ng puson, marapat lamang iwasan ng pasyenteng buntis ang sumusunod, sabi ni Dr. Esquivias-Chua.

  • Iwasan ang magkaroon ng UTI.
  • Uminom ng maraming tubig sa araw-araw.
  • Huwag magpipigil o katamaran ang pag-ihi, kahit gaano pa ito kadalas.
  • Maghugas ng ari tatlong beses sa isang araw.
  • Ingatan ang hygiene para makaiwas sa iba’t ibang uri ng impeksyon.
  • Huwag magpapagod at pupuwersahin ang sarili, tulad ng pagtakbo, pagtalon, at mabibigat na anyo ng ehersisyo.
  • Minimal activities lamang dapat para maiwasang makunan.

Paalala ni Dr. Esquivias-Chua, “at any age of pregnancy” ay dapat isabuhay at gawing pamantayan ng mga buntis ang mga nabanggit sa itaas.

Also read: Pananakit ng puson: Sanhi, sintomas, at gamot para dito

Para sa mga nagnanais ng karagdagang impormasyong medikal at personal na konsultasyon mula sa ating kinapanayam na ob/gyn, hanapin at i-like lamang ang Facebook page ng kanilang clinic, MCEC Mother and Child OB-Gyne Ultrasound and Pedia Clinc. Si Dr. Maria Carla Esquivias-Chua ay aktibong Ob/Gyn consultant ng Capitol Medical Center.

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!

app info
get app banner