Estudyante patay matapos mabigyan ng gamot pampurga sa eskwelahan
Narito ang mga paalala bago painumin ng pampurga ang mga bata.
Pagpurga sa bulate sa tiyan ng isang bata naging dahilan nga ba ng pagkamatay nito?
Ito ang iniimbestigahan ng mga awtoridad ngayon matapos mai-report ang pagkamatay ng isang estudyante mula sa Surigao del Norte. At ang pagkakaospital ng pito pa matapos makainom ng libreng pampurga sa kanilang eskwelahan.
Image from Wyoming Medical Center
Pagpurga ng bulate sa tiyan
Ang pag-inom ng pampurga sa bulate sa tiyan ang itinuturong dahilan ng pagkamatay ng isang estudyante at pagka-ospital ng pitong iba pang mag-aaral ng San Isidro Elementary School sa Surigao del Norte.
Ayon sa pahayag ng lola ng nasawi, limang oras matapos mabigyan ng libreng pampurga sa kanilang eskwelahan ang apo niya ay inireklamo na nito ang pananakit ng tiyan at biglang pakawala ng kaniyang paningin.
Naisugod pa raw sa ospital ang bata, ngunit binawian rin ito agad ng buhay.
Pitong estudyante rin mula sa nasabing paaralan ang na-ospital dahil sa pananakit ng tiyan at pagsusuka matapos mabigyan ng gamot na pampurga.
Ayon sa kinauukulan ang tableta na Albendazole ang ibinigay na gamot na pampurga sa bulate sa tiyan sa mga bata.
Paliwanag naman ng guro ng nasawing bata na si Gng. Thelda Paray ay hindi naman daw nagreklamo ang bata sa kung anumang kaniyang nararamdaman matapos painumin ng pampurga. Ngunit natatandaan niya na noong Hunyo ay palagi na nitong dinadaing ang madalas na pananakit ng tiyan.
Dagdag pa ng guro ay nakakain naman daw ang bata bago ito painumin ng pampurga. At may parent consent na pinapirmahan sa mga magulang bago naisagawa ang pagpupurga.
Pahayag ng kinauukulan
Sa kalusukuyan ay hinihintay pa ang resulta ng imbestigasyon at autopsy ng nasawing bata para malaman kung ano ang dahilan ng ikinamatay nito. Isinailalim narin sa toxicity test ang pampurga sa bulate sa tiyan na ipinainom sa kaniya at sa iba pang mag-aaral ng eskwelahan.
“Lahat naman ng gamot, may possibility of allergy. Pero kasi ito, may seven patients din, children din who had similar symptoms”, pahayag ni DOH Undersecretary Eric Domingo.
“That’s why we’re trying to look into it more deeply lang to check kung walang contaminant or kung walang anything na toxic substance na na-take”, dagdag pa niya.
Sa ngayon ay ipinatigil muna ang deworming activities sa nasabing lugar. Ipinatigil narin muna ang paggamit ng deworming medicine na ginamit sa eskwelahan sa iba pang lugar. Bagamat, ayon sa latest report ay walang naman daw naitalang kaparehong nitong kaso.
Paalala ng DOH tungkol sa pagpupurga
Nauna narin noong nagbigay paalala ang DOH sa precautionary measures sa pag-inom ng pampurga sa bulate sa tiyan.
Ayon sa DOH, ang deworming tablet na Albendazole 400mg at Mebendazole 500mg tablet ay dapat iniinom after meal o pagkatapos kumain.
Asahan ring maaring makaranas ng “adverse events” ang isang batang uminom ng gamot pampurga. Ito ay ang allergy, mild abdominal pain, diarrhea at erratic worm migration o paglabas ng bulate sa katawan ng bata. Madalas ay mararanasan daw ang mga sintomas na ito sa unang sampung oras matapos makainom ang bata ng pampurga sa bulate sa tiyan.
Pinaalala rin ng DOH na may ilang bata ang hindi puwedeng uminom ng gamot na pampurga. Ito ay ang mga batang may sakit, nakakaranas na pananakit ng tiyan, may lagnat at nagtatae. Pati narin ang nakaranas na ng hypersensitivity sa gamot at severely malnourished o underweight.
Kaya naman bago isagawa ang pagpupurga sa mga paaralan ay nagbibigay ng parent consent form. Ito ay pipirmahan ng mga magulang matapos matiyak na hindi nakakaranas ng mga sumusunod na kondisyon ang anak.
Source:
Abante , GMA News , Medical Observer
