10 rules para sa mga bibisita kay baby

lead image

Mahalaga ang mga rules na ito upang hindi mahawa ng mga sakit ang iyong sanggol.

Ang pagkakaroon ng newborn baby ay isang napaka-exciting na panahon. Hindi lang para sa mga magulang, ngunit pati na rin sa kanilang mga kaibigan at kamag-anak.

Ngunit sa mga nais na bumisita kay baby, hindi puwedeng basta-basta na lang bumisita ang mga tao. Kaya kailangang gumawa ng mga magulang ng mga rules for visiting baby upang masigurado na safe si baby, at hindi kayo mapapagod sa mga parating na bisita.  

10 Rules for visiting baby na dapat sundin

1. Siguraduhing naghugas sila ng kamay

Hahawakan man nila si baby o hindi, importante na maghugas sila ng kamay. Ito ay upang makaiwas sa pagkalat ng bacteria o mga virus, at masiguradong safe si baby.

2. Hindi puwedeng hawakan ng basta-basta si baby

Para sa ilang mga magulang, hindi sapat ang paghuhugas ng kamay upang mapatay ang mga germs. Para sa ibang magulang, mas safe ang kanilang pakiramdam kung hindi hahawakan ng mga bisita ang kanilang sanggol.

Kung ganito rin ang iyong paniniwala, ay walang masama dito, at importanteng respetuhin ng iyong mga bisita.

3. Hindi rin puwedeng halikan si baby ng basta-basta

Pagdating sa rules for visiting baby, importante na huwag hayaang halikan ng kung sino-sino ang iyong sanggol. Ito ay maraming mga bacteria sa bibig ng tao, at puwedeng mahawa ang baby ng iba't-ibang mga sakit kapag siya ay hinalikan.

4. Mas mainam kung kumpleto ang kanilang mga vaccinations

Mahalaga ang vaccinations para sa mga bibista kay baby, dahil sensitibo ang immune system ng mga sanggol, at mabilis silang mahawa ng sakit. Kaya hangga't-maaari, siguraduhing kumpleto ang iyong vaccinations bago ka bumisita

5. Huwag silang hayaan na magtagal

Nakakapagod ang mag-alaga ng baby, at nakakapagod rin ang mag-entertain sa mga bisita. Kaya't importante na huwag nang patagalin ang mga bisita, upang magkaroon ka ng sapat na pahinga at makapag-ayos sa iyong bahay.

6. Siguraduhin na may pasabi muna bago sila bumisita

Palaging busy ang mga magulang, at minsan ay nakakasira ng kanilang diskarte kung bigla na lang may bumisita nang walang pasabi. Kaya't importante na sabihin sa iyong mga kamag-anak at kaibigan na magsabi muna kung sila ay mayroong planong bumisita upang makita si baby.

7. Bawal silang pumunta kapag mayroon silang sakit

Ang isa pa sa mga pinaka-importanteng rules for visiting baby ay ang pagbabawal na bumisita ang mga maysakit. Kasama na rin dito ang mga taong kagagaling lamang sa sakit.

Ito ay dahil mataas ang posibilidad na mahawa ang iyong baby ng kung anu-anong sakit. Napakabilis at matindi ang epekto ng sakit sa mga sanggol dahil hindi pa developed ang kanilang immune system. Kaya't hangga't-maaari ay huwag hayaang mahawa ng sakit si baby.

8. Bawal ang maingay

May ilang mga tao na mabilis ma-excite, o kaya mabilis matuwa kapag nakakakita ng sanggol. Bagama't wala namang masama dito, baka makaabala ito kay baby kung masyadong maingay o madaldal ang iyong bisita.

Kaya hangga't-maaari, siguraduhin na tahimik ang tinutulugan ni baby, at iwasan ang pagkakaroon ng ingay o malalakas na tunog.

9. Huwag hayaan na magpost sila ng mga letrato ng basta-basta sa social media

Para sa mga magulang na nais gawing pribado ang buhay ng kanilang sanggol, importante na pagsabihan ang iyong mga kamag-anak at kaibigan na huwag basta-basta magpost ng mga pictures ng iyong baby online.

Ito ay para sa security ng iyong baby, dahil may ilang mga tao na gumagamit ng mga picture ng mga sanggol online upang manloko. Kaya't pwede mo naman pagsabihan ang mga bisita na huwag mag-post ng basta-basta kung hindi mo sila pinapayagan.

10. Nasa iyo ang desisyon kung pwede nilang bisitahin ang iyong anak

Ang pinaka-final rule para sa mga magulang ay nasa kanila ang huling desisyon kung puwedeng bisitahin ang iyong baby. Kung busy ka, o kaya ay wala ka sa mood na tumanggap ng bisita, karapatan mo na tanggihan sila.

Huwag mong kalimutan na ang kapakanan ng iyong sanggol ay dapat pinaka-priority mo. Kung sa tingin mo ay hindi makabubuti sa iyong sanggol ang pagbisita ng ilang mga tao, ay desisyon mo yun.

Hindi ka dapat matakot o mahiya na magbawal ng mga bisita, dahil karapatan mo iyon bilang magulang.

Source: ABC

Basahin: 1-taong gulang, nagkaroon ng herpes dahil sa halik

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!

app info
get app banner