Ano ang rotavirus at paano ito maiiwasan ng iyong sanggol?

Ano ang rotavirus at paano ito maiiwasan ng iyong sanggol?

Mahalaga na mabigyan ng rotavirus vaccine ang iyong sanggol. Ito ay upang maiiwas siya sa sakit na maaring maging banta sa bata at mahina niya pang katawan.

Sanhi ng pagtatae ng sanggol dulot ng rotavirus, narito kung paano maiiwasan at mapo-protektahan ang iyong anak.

Rotavirus bilang sanhi ng pagtatae ng sanggol

Sa pamamagitan ng isang GSK webinar kasama ang the Asianparent Phillipines ay sinagot ni Dr. Edwin Rodriguez, isang pediatrician ang mga madalas na katanungan ng mga magulang tungkol sa rotavirus na isa sa sanhi ng pagtatae ng sanggol. Pati na ang mga paraan kung paano ito malulunasan at maiiwasan.

Una nga sa nilinaw ni Dr. Rodriguez, ay ang maaaring maidulot na peligro ng rotavirus sa kalusugan ng mga maliliit na bata. Ayon sa kaniya, ang rotavirus ang isa sa mga dahilan kung bakit nagtatae ang isang sanggol o bata. Ang diarrhea na dulot ito ay itinuturing na pangalawa sa sakit na pneumonia na nagdudulot ng sakit o maaaring maging dahilan ng kamatayan ng batang may edad 5-taong gulang pababa.

Ayon pa rin kay Dr. Rodriguez, hindi dapat ipagwalang bahala ng mga magulang ang pagtataeng dulot ng rotavirus. Dahil itinuturing na nag-iisang dahilan ng severe dehydrating gastroenteritis sa mga bata sa buong mundo. Kung ito’y mapabayaan ay maaaring makaranas ng mas malalang komplikasyon ang isang bata o kaya naman ay mauwi ito sa maaga niyang pagkasawi.

sanhi ng pagtatae ng sanggol

Image from Freepik

Sintomas ng diarrhea na dulot ng rotavirus

Ang rotavirus ay maaaring makuha ng isang bata o sanggol sa loob ng bahay. Ito’y maaaring pumasok sa kaniyang katawan sa pamamagitan ng kaniyang bibig. Maaaring kumapit ito sa mga bagay na kaniyang nahahawakan o isinusubo. Isa sa mga dahilan kung bakit ang madalas na tinatamaan ng sakit na ito ang mga sanggol o maliliit na bata. Sapagkat sila’y madalas na pumupulot ng kung ano-ano at isinusubo sa kanilang bibig.

Ayon pavrin kay Dr. Rodriguez, ilan nga sa sintomas ng pagtataeng dulot ng rotavirus sa mga bata ay ang sumusunod:

  • Malalang pagtatae
  • Duming matubig bagama’t walang dugo
  • Pagsusuka
  • Lagnat
  • Pananakit ng tiyan

Ang mga sintomas na ito ay maaaring magsimulang maranasan sa loob ng dalawang araw matapos ma-expose sa rotavirus. Maaaring tumagal ng 3-8 araw ang pagtatae at pagsusuka. Habang maaari rin itong sabayan ng ipa pang sintomas tulad ng kawalang-gana sa pagkain at dehydration na lubhang delikado para sa mga sanggol at maliliit na bata. Dahil sa ito’y maaaring magdulot ng maraming komplikasyon sa mahina pa nilang katawan na maaaring maging sanhi ng kanilang pagkamatay.

Ayon sa CDC, ang mga sintomas ng dehydration na dapat bantayan sa inyong mga anak ay ang sumusunod:

  • Madalang na pag-ihi kumpara sa normal.
  • Panunuyo ng labi at lalamunan.
  • Pagkahilo sa tuwing tatayo.
  • Pag-iyak na may kakaunti o walang luha.
  • Hindi normal na pagiging antukin at irritable.

Paano malulunasan at maiiwasan ang pagtataeng dulot ng rotavirus?

Walang gamot ang maaaring magbigay lunas sa pagtataeng dulot ng rotavirus. Ang tanging paraan lang upang maiwasang lumala ito ay ang pagsisiguro na ang pasyenteng nakakaranas nito ay nakakakuha ng sapat na fluids o tubig na kailangan ng kaniyang katawan.

sanhi ng pagtatae ng sanggol

Image from NIPH

Bigyan ng rotavirus vaccine ang iyong anak.

Kaya naman payo ni Dr. Rodriguez, mas mabuting iwasan itong maranasan ng iyong anak sa pamamagitan ng pagbibigay sa kaniya ng rotavirus vaccine. Ito’y sinisimulang ibinibigay sa mga batang may edad na 6 linggo na nakadepende ang formulation o beses ng pagbibigay base sa rekomendasyon ng pediatrician ng isang bata.

May isang bagay ring nilinaw si Dr. Rodriguez sa mga magulang na inaakalang sapat ng panlaban sa rotavirus ang nutrition na nagmumula sa kanilang gatas.

“Ang breastmilk ang pinakamahusay na source of nutrition para sa ating mga sanggol o anak. Totoo rin na may antibodies na makukuha sa breastmilk na maaaring makapagpababa ng incidence ng ear infection, pneumonia at diarrhea sa sanggol. Subalit tandaan natin na ang mga antibodies na galing sa breastmilk ay hindi panghabang-panahon. Sa katagalan sa loob ng 6-12 months maaaring bumaba ang antibodies na nakukuha ng mga babies sa breastmilk. At hindi rin kayang proteksyonan ng breastmilk ang ating babies sa lahat ng mga sakit na maaaring mlalabanan ng mga bakuna.”

Ito ang pahayag ni Dr. Rodriguez. Kaya rekumendasyon niya, huwag magdalawang-isip na pabakunahan ang iyong anak. Ito man ay rotavirus o iba pang uri ng vaccine na makakatulong na ma-proteksyunan siya laban sa mga sakit.

“Lahat ng bakuna ay mahalaga. Lahat ng bakuna na maaaring ibigay para maalagaan ang ating mga anak ay pantay-pantay po ang kahalagahan.”

Hindi pag-iipin ang nagdudulot ng pagtatae sa mga sanggol.

Paglilinaw din niya, ang pag-iipin ng mga sanggol at pagtatae ay maaaring co-incidental o nagkasabay lamang. Lalo pa’t ang mga batang nag-iipin ay mahilig ngumatngat ng mga bagay na kanilang nahahawakan. Sila rin ay madalas na naglalaway at kung ano-ano ang inilalagay sa bibig. Ang pangunahing paraan upang makapasok ang rotavirus sa katawan.

“Dahil normal na naglalaway o subo ng subo ng kung anu-ano ang mga sanggol habang sila ay lumalaki, mahalaga na mabakunahan sila. Ito ay upang maiwasan at mapangalagaan sila sa rotavirus na sanhi ng pagtatae ng sanggol.”

sanhi ng pagtatae ng sanggol

Image from Freepik

Side effect ng rotavirus vaccine

Ito ang dagdag pang pahayag ni Dr. Rodriguez. Ayon pa rin sa kaniya, mahalagang malaman ng mga magulang na bagama’t naproprotektahan ng rotavirus vaccine ang mga bata sa pagtataeng dulot nito, may side effect rin ito sa sanggol. Bagama’t ito ay minimal at bibihira lang na nangyayari. Ang natatanging naitala nga lang na side effect nito ay ang pagiging irritable o iyakin ng sanggol matapos maipatak ang rotavirus vaccine sa kanilang bibig.

May mga sanggol rin na maaaring hindi puwedeng mabigyan nito. Dahil baka imbis na makabuti ay makasama pa ito sa kanilang katawan. Tulad ng mga naitalang nakaranas ng allergic reactions dito. May congenital malformation sa bahagi ng katawan na daanan ng pagkain. At ang mga nagtataglay ng immuno-deficiency disease o mahina na ang immune system pagkapanganak.

Huling paalala naman ni Dr. Rodriguez sa mga magulang, kung may mga agam-agam sa kalusugan ng iyong anak mabuting magtanong sa inyong pediatrician. Lalo na kung ito’y tungkol sa mga bakuna na ginawa para protektahan sila sa mga sakit na maaring magdulot ng banta sa kanilang kalusugan at mahina pang katawan.

 

Source:

CDC

BASAHIN:

Pagtatae ng bata: Gamot, home remedies at ang dapat gawin ng magulang

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!

Article Stories
app info
get app banner