Newborn Eye Discharge: Mga mahalagang kaalaman

Share this article with other moms

Narito ang mga hakbang sa pag-aruga sa iyong sanggol na may problema sa pagmumuta ng mata Narito ang mga hakbang sa pag-aruga sa iyong sanggol na may problema sa pagmumuta ng mata

Karaniwan ang pagkakaroon ng newborn eye discharge o pagmumuta pagkapanganak kay baby, o sa mga unang linggo ng kaniyang buhay. Isa ito sa mga kondisyon na gumagaling at nawawala kahit walang paggamot o intervention. Bagamat may mga pagkakataon na kinakailangan ng atensiyon at opinyong medikal.

Pagmumuta ng mga sanggol o Newborn Eye Discharge

Paano nga ba aalagaan ang mga mata ng iyong sanggol kapag mayroon siyang newborn eye discharge o pagmumuta? Narito ang mga hakbang upang maiwasan ang paglala o komplikasyon.

1. Pagmasdan kung may sintomas

Mapapansin mo na kaagad kung may pagmumuta o newborn eye discharge ng isang sanggol na kapapanganak pa lamang. Kuwento ni May Anne DeRama-Santos, noong ipinanganak ang kaniyang anak na si Rain, nakita nila agad ang na nagluluha ito ay may madilaw na discharge sa dalawang mata.

“Sabi ng doktor, normal daw ‘yon sa mga babies,” ani May Anne. Nawawala din ito pagkalipas ng ilang araw at hindi dapat ikabahala.

May iba-ibang sanhi o dahilan kung bakit nagkakaroon ng ganitong kondisyon ang mga mata ng sanggol. Kung alam mo ang mga sintomas na dapat tingnan, magkakaroon ng ideya kung ano nga ba ito, at masasabi sa doktor kaagad.

Ayon kay Nornelie Paniza, RN, ito ay maaaring:

Baradong Tear Duct

Ito ang nangyari kay baby Rain, kuwento ni MayAnne. Tinatayang 50% ng mga bagong panganak na sanggol ay nagkakaroon ng newborn eye discharge dahil sa baradong tear ducts. Matubig ang mga mata kaya’t tumutulo ang luha kahit hindi naman umiiyak.

Mayroon din namumuong tuyong luha sa sulok ng mata, dahil hindi nailalabas, kaya’t nagiging madilaw, o tinatawag na muta o sleep crust. Kung hindi mapula o wala namang pink eye, walang dapat ikabahala. Ngunit kapag nababad ng matagal ang mata at sulok ng mata, at hindi dumadaloy ang luha, maaaring maimpeksiyon.

Normal na Discharge

Minsan naman ay may kaunting discharge mula sa mata dahil sa mucus na nabuo mula sa maduming kamay na naikamot o nakusot sa mata. Napupunasan ito kaagad at walang kailangang gamot.

photo: dreamstime

Napuwing o may pumasok sa mata

May mga pagkakataon naman na napupuwing ang bata, o may mga maliliit na bagay tulad ng buhangin o alikabok ang napupunta sa mata ng bata. Kung hindi ito maalis agad, nagkakaron ng reaksiyon ang mata—at may inilalabas na mucus o maaari din itong maging sanhi ng impeksiyon.

Bacterial Conjunctivitis

Ang kondisyong ito ay isang bacterial infection sa mata. May lumalabas na nana o pus na naghuhudyat ng impeksiyon. Nagkakadikit-dikit ang pilik mata ng bata at halos hindi na maidilat ang mga mata.

2. Para makasigurado, maagap na dalhin sa doktor ang sanggol para makita kung ano nga talaga ang kondisyon, at mabigyan ng gamot kung kinakailangan

Tanging ang doktor ang makapagsasabi kung ano ang pinakamabisang paraan para matulungan si baby. Ang mahalaga ay masiguradong walang impeksiyon, o kung mayroon man, ay magamot ito kaagad.

3. Bigyan ng unang lunas o home remedy, para maibsan ang kondisyon o maiwasan ang paglala

Narito ang mga maaaring gawin:

  • Punasin ang madilaw o namuong discharge sa mata ng bata gamit ang malambot at malinis na pamunas na binasa ng maligamgam na tubig.
  • Dahan-dahang (huwag madiin) masahehin ang tear ducts para matanggal ang bara. Ito ang bahagi ng mata na nasa sulok, sa bandang ibaba, malapit sa ilong. Siguraduhing malinis ang mga daliri kapag ginawa ito. Ulitin ng hanggang 6 na beses sa loob ng isang araw.
  • Akala ko noon ay paniniwala lang ng matatanda ang pagpatak ng gatas ng ina sa mata kapag may discharge o sore eyes. Ngunit ayon sa mga pagsusuri, pagsasaliksik at mga doktor, ang gatas ng ina ay may taglay na antibiotic properties at white blood cells, kaya’t sinasabing ligtas itong gamitin sa mga sanggol na may blocked tear duct o newborn eye discharge, ngunit walang sapat na ebidensiya para sabihing ito ay nakagagamot ng conjunctivitis. Ang ilang patak lamang sa tear ducts ay makakatulong ito sa bacterial infection. Mas ligtas pa nga daw ito sa mga gamot. Mas makakabuting hingin ang payo ng doktor bago subukan ang alternatibong ito.
  • Kumunsulta sa doktor. Ang mga nabanggit sa itaas ay mga alternatibo habang hindi pa naikukunsulta sa doktor ang kondisyon ng sanggol. Wala pa ring mas mahalaga kundi ang diagnosis at paggamot ng isang pediatrician o espesyalista.
  •  Sundin ang payo ng doktor at huwag kaligtaan ang mga nireseta o binigay na gamot.
sources: PubMed Health. Conjunctivitis. A.D.A.M. Medical Encyclopedia 2010 [cited 2011 November 6]. Fields, D. and A. Brown. Baby 411: Clear Answers and Smart Advice for Your Baby’s First Year. 3rd ed. Boulder, CO: Windsor Peak Press. 2008.

BASAHIN: Infant Visual Development: Mga mahalagang kaalaman

Baby Health Baby Ages + Stages