9 signs na malapit nang manganak ang buntis

9 signs na malapit nang manganak ang buntis

Pagsapit ng kabuwanan, simula na rin ito nang hindi mapagpakaling mga oras sa bawat araw na lumilipas para sa nagbubuntis; tila isang paghahanda ng katawan para sa nalalapit na araw panganganak. Mahahalagang senyales na manganganak na ang buntis, tunghayin!

First-time mom ka man, second-time, o makailang beses nang nagbuntis, paniguradong hindi natitiyak ang ganap na oras ng iyong panganganak. Dito pumapasok ang kahalagahan ng pagiging mapanuri sa sariling katawan, at sa pang-araw-araw na pagbabago ng mga nararamdaman at nararanasan ng isang buntis. Ang mga pagbabagong emosyonal, pisikal, at pisyolohikal ay may kaakibat na mahahalagang senyales na manganganak na ang isang buntis.

Importanteng nabibigyang-pansin ng isang buntis ang mga partikular na nararanasang senyales na manganganak na ito para sa mas handa at ligtas na panganganak.

Dito sa theAsianparent Philippines ay mahalaga sa amin ang makapagbigay ng impormasyon na wasto, makabuluhan, at napapanahon, ngunit, hindi ito dapat gawing pamalit sa payo ng doktor, o kaya sa medical treatment. Walang pinanghahawakang responsibilidad ang theAsianparent Philippines sa mga nagnanais na uminom ng gamot base sa impormasyon sa aming website. Kung mayroong agam-agam, ay nirerekomenda naming magpakonsulta sa doktor upang makakuha ng mas malinaw na impormasyon.

9 senyales na manganganak na ang isang nagbubuntis
1. Mababa na ang tiyan ng buntis

Pagtuntong ng isa hanggang apat na buwan bago ang iyong due date, nagsisimula nang bumaba si baby sa direksyong pababa sa iyong balakang (pelvis). Umiikot-ikot na siya sa loob bilang paghahanda ng kaniyang posisyon.

Dahil nakadagan si baby sa iyong pantog, kaakibat nito ang mas madalas mong pag-ihi sa banyo, nang puro pakau-kaunti lamang. Sa isang banda, maaari mong mapuna na mas maluwag na ang iyong paghinga dahil hindi na ganoon kabigat ang pressure na dala ni baby sa iyong baga, kumpara sa dati niyang puwesto.

2. Nagsisimula nang bumuka ng sipit-sipitan o cervix

Kapag kabuwanan na, bukod sa regular ultrasound at consultation na isinasagawa sa clinic ng iyong obstretrician-gynecologist, magsisimula na ring sukatin ng doktor ang iyong sipit-sipitan o cervix.

Sinusuri nila kung unti-unti na nga bang bumubuka ang sipit-sipitan ng ina, dahil ito ang magsisilbing pintuang lalagusan ni baby sa takdang panahon ng pangananak.

3. Mas madalas pamumulikat at pananakit ng balakang

Habang tumatagal na lumalaki at bumibigat ang dinadalang bata ng ina sa kaniyang sinapupunan, likas lamang na mas madalas at higit na matinding pamumulikat ang mararanasan kung kabuwanan. May kaakibat itong mas dumadalas na pamumulikat at pananakit ng mga singit-singit, na nangangahulugan ng paghahanda ng iba’t ibang bahagi ng katawan sa paglabas ng baby mula sa sinapupunan.

4. Nakararamdam ng parang nagluluwagan o naghihiwa-hiwalay ang buto-buto sa katawan

Isang hormone na “relaxin” kung tawagin ang nililikha ng katawan ng isang nagdadalang-tao sa buong panahon ng kaniyang pagbubuntis. Nagagawa ng hormone na itong palambutin ang mga litid at paluwagin ang mga buto-buto sa katawan. Muli, isang paraan ito ng katawan upang paghandaan lalo na ang pagbuka ng sipit-sipitang paglalabasan ng bata.

5. Nagtatae

Ang pagtatae ay mahalagang bahagi ng pagkakalma ng katawan ng buntis bilang paghahanda sa nalalapit na panganganak. Bagama’t iniiwasan ito hangga’t maaari, hindi ito mapipigil. Panatilihing hydrated ang katawan, at maging maingat sa mga posibleng disgrasya ng paglabas-masok sa banyo.

6. Hindi na nadaragdagan o unti-unti pa ngang nababawasan ang timbang

Sa mga huling linggo ng pagbubuntis, at nalalapit na araw ng panganganak, humihinto nang maragdagan ang timbang ng nagdadalang-tao. Huwag mangambang masama ang epekto nito sa iyong baby. Ibig sabihin lamang nito, maaaring unti-unti na ring nababawasan ang amniotic fluid na nagsisilbing unan, pumoprotekta, at namamagitan sa pagdadala ng nutrients sa sistema ng baby mula sa ina.

7. Nagbabago ang kulay ng likidong lumalabas sa puwerta (vaginal discharge)

Madalas na nagkakaroon ng kakaibang vaginal discharge ilang oras na lamang bago manganak ang buntis. Karaniwan itong buo-buo na parang hitsurang regla. Ito ang mucus plug na nakabara o nakaharang sa sipit-sipitan ng buntis. Ang paglabas nito ay indikasyong bumubuka na ang daanan ng bata palabas ng sinapupunan.

8. Mas tumitindi at mas dumadalas na paghilab ng tiyan

Mainam na senyales ng aktibong paghilab (active labor) ang paninigas ng tiyan. Indikasyon ito ng pagsasanay ng matris sa aktuwal na paghilab ng tiyan at paglabas ng bata.

Ang paghilab ng tiyan ay nararanasan sa ibabang bahagi ng tiyan, na patindi nang patindi at padals nang padalas habang lumalaon. Isa pa, ang pagsakit ng balakang na hindi mawala-wala, paikot sa iyong harap sa bahaging puson paitaas.

9. Pagputok ng panubigan

Halos 15% lamang ng nagbubuntis ang nakararanas na maputukan ng panubigan bago ang aktuwal na panganganak. Bagama’t isa ito sa pinakakonkretong senyales na manganganak na ang buntis, hindi na ito dapat pang hintaying mangyari bago magtungo sa hospital o magpatawag ng komadrona para manganak.

Mga dapat isaalang-alang ng buntis na malapit nang manganak

Malayo pa o nasa panahon na ng iyong kabuwanan, mahalagang naoobserbahan sa sarili ang mga nabanggit na senyales nang nalalapit na panganganak upang mapanatiling ligtas ang ina at ang bata mula sa mga hindi inaasahang pangyayari.

  1. Tandaang ilan sa mga senyales ng pagle-labor ang paghilab ng tiyan nang may sampu hanggang dalawampung minutong pagitan, at may kaakibat na mas matinding sakit sa paghilab.
  2. Magkakaiba ang bawat nagdadalang-tao sa isa’t isa. Ang mga naranasan ng iyong kaibigang dati nang nagbuntis ay hindi eksaktong mararanasan mo rin lahat, lalo na ang karanasan sa panganganak.
  3. Mahalagang nakikilala ang sarili, mula sa unang araw na nalaman ang iyong pagdadalang-tao hanggang sa panahong naghihintay na lamang ng paglabas ni baby mula sa iyo. Dahil nakasalalay sa maayos na pagsusuri ng mga pagbabago sa sarili ang ligtas na kahandaan sa panganganak.
  4. Ituring na kaibigan ang iyong doktor. Ibahagi ang lahat ng mga pagbabagong nararanasan sa iyong ob-gyn. Kung may mga tanong at alinlangan, huwag mangimi o matakot na magtanong dahil susi pa rin ito sa iyong kapanatagan at pag-iwas sa pag-iisip ng kung ano-ano.

Basahin: Buntis na nagle-labor na pala, naire ang kaniyang sanggol sa CR

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!

app info
get app banner