Ang pagpapasuso ay hindi lamang paraan ng pagpapakain ng sanggol. Ito rin ay isang mahalagang sandali ng koneksyon sa pagitan ng ina at anak. Para sa mga bagong ina, maaaring maging nakakalito sa simula ang paghahanap ng tamang posisyon at pamamaraan, lalo na kung may kasamang pagod, pananakit, o pangamba kung nakakakuha nga ba ng sapat na gatas si baby.
Kaya naman mahalagang matutunan ang mga epektibong posisyon sa pagpapasuso, hindi lamang para maging komportable ang ina, kundi upang matiyak na nakakakuha ng sapat na nutrisyon ang sanggol.
Sa gabay na ito, tatalakayin natin ang iba’t ibang posisyon sa pagpapasuso, mga tips para sa mas matagumpay na breastfeeding, at kung kailan mainam humingi ng tulong.
Bakit Mahalaga ang Tamang Posisyon sa Pagpapasuso?
Gabay sa Ina: Tamang Posisyon sa Pagpapasuso Ng Sanggol
Ang tamang posisyon sa pagpapasuso ay nakatutulong upang:
-
Masigurong nakakakuha ng sapat na gatas ang sanggol.
-
Maiwasan ang pananakit ng utong at iba pang discomfort sa ina.
-
Mapanatili ang magandang daloy ng gatas at maiwasan ang pagbara ng milk ducts.
Tamang Posisyon sa Pagpapasuso ng Sanggol
Narito ang ilang posisyon na maaaring subukan:
1. Cradle Hold
Gabay sa Ina: Tamang Posisyon sa Pagpapasuso Ng Sanggol | Image from Unicef
Ang ulo ng sanggol ay nasa baluktot na bahagi ng braso ng ina, habang ang katawan ng sanggol ay nakaharap sa ina. Ito ay isang classic breastfeeding position na madalas gamitin.
Paano gawin: Hawakan ang sanggol sa baluktot na bahagi ng iyong braso, habang nakasandal ang ulo niya sa iyong siko. Siguraduhing ang kanyang tiyan ay nakaharap sa iyong katawan, upang hindi niya kailangang iikot ang ulo para dumede.
Tip: Gamitin ang kabilang kamay upang suportahan ang dibdib mo at gabayan ang pag-latch ni baby.
2. Cross-Cradle Hold
Gabay sa Ina: Tamang Posisyon sa Pagpapasuso Ng Sanggol | Image from Unicef
Ang ina ay gumagamit ng kabilang braso upang suportahan ang katawan ng sanggol, habang ang kabilang kamay ay humahawak sa ulo ng sanggol upang gabayan ito sa pag-latch. Magandang posisyon ito para sa mga bagong silang na sanggol o sa mga may problema sa pag-latch.
Paano gawin: Gamitin ang kabilang braso (kabaligtaran ng suso na gamit sa pagpapasuso) upang suportahan ang katawan ng sanggol. Ang kabilang kamay ay nasa likod ng ulo ng sanggol upang i-guide siya sa pag-latch.
Tip: Magandang posisyon ito para sa mga bagong ina na kailangang mas mapanood kung paano dumedede si baby at kung tama ang latch.
3. Football Hold
Gabay sa Ina: Tamang Posisyon sa Pagpapasuso Ng Sanggol | Image from Unicef
Ang sanggol ay nakaposisyon sa gilid ng ina, na parang hawak na football, na ang mga paa ay nakaturo sa likod ng ina. Mainam ito para sa mga inang nanganak sa pamamagitan ng cesarean section.
Paano gawin: Ilagay si baby sa gilid, suportado ng braso, na parang hawak mo ang isang football. Ang kanyang mga paa ay nakaturo sa likod mo, habang ang kanyang ulo ay malapit sa iyong dibdib.
Tip: Gumamit ng nursing pillow para suportahan ang katawan ng sanggol, lalo na kung ikaw ay naka-C-section.
4. Side-Lying Position
Gabay sa Ina: Tamang Posisyon sa Pagpapasuso Ng Sanggol | Image from Unicef
Ang ina at sanggol ay parehong nakahiga sa kanilang tagiliran, nakaharap sa isa’t isa. Magandang posisyon ito para sa mga ina na nagpapahinga o sa mga nagpapasuso sa gabi.
Paano gawin: Humiga sa iyong tagiliran, at iposisyon si baby sa tabi mo, nakaharap sa iyo. Siguraduhing naka-level ang kanyang bibig sa iyong utong.
Tip: Panatilihing malapit ang braso mo sa likod ni baby upang maiwasan ang pag-roll. Mainam ito para sa night feedings.
5. Laid-Back Position
Gabay sa Ina: Tamang Posisyon sa Pagpapasuso Ng Sanggol | Image from Unicef
Ang ina ay nakahiga nang bahagyang nakasandal, habang ang sanggol ay nakapatong sa kanyang dibdib. Hinahayaan ang sanggol na gumamit ng kanyang natural na reflexes upang hanapin ang utong at mag-latch.
Paano gawin: Humiga o umupo nang bahagyang nakasandal at ipatong si baby sa iyong dibdib. Hayaan siyang gumamit ng natural reflexes para hanapin ang utong.
Tip: Siguraduhing suportado ang ulo at leeg ni baby habang siya ay gumagalaw papunta sa iyong dibdib.
Mga Tips para sa Tamang Pagpapasuso
-
Siguraduhing Tama ang Latch: Ang bibig ng sanggol ay dapat nakabuka nang malaki, at ang utong ay malalim na nasa loob ng kanyang bibig.
-
Panatilihin ang Komportableng Posisyon: Gumamit ng mga unan o breastfeeding pillow upang suportahan ang iyong braso at likod.
-
Magpahinga at Uminom ng Sapat na Tubig: Ang tamang hydration at pahinga ay nakatutulong sa produksyon ng gatas.
-
Kumonsulta sa Lactation Consultant: Kung nahihirapan, huwag mag-atubiling humingi ng tulong sa mga eksperto.
Ang tamang posisyon at paraan ng pagpapasuso ay mahalaga upang masigurong nakakakuha ng sapat na nutrisyon ang iyong anak at upang mapanatili ang kalusugan ng ina. Sa pamamagitan ng pagsasanay at suporta, ang pagpapasuso ay maaaring maging isang positibo at rewarding na karanasan para sa parehong ina at sanggol.
Tandaan, ang bawat ina at sanggol ay natatangi. Ang mahalaga ay ang paghanap ng posisyon at paraan na komportable at epektibo para sa inyo.
Huwag mag-atubiling humingi ng tulong at suporta kung kinakailangan.
May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!
