Ubo ng buntis: Ano ang safe na gamot para malunasan ito?

Alamin ang gamot sa ubo ng buntis na safe para sa dinadalang sanggol.

Ang ubo ay karaniwang dumadapo sa mga nagbubuntis kapag panahon ng taglamig at tag-ulan, o nagpapalit ang panahon na sanhi ng mild viral infection. Madalas ay kusa naman itong nawawala dahil may natural na proteksiyon ang ating katawan laban sa mga impeksiyon na ito.

Pero paano kung hindi na kaya ni mommy ang sakit na dulot ng pag-ubo, o kaya ay hindi gumagaling ito? Ligtas bang uminom ng gamot sa ubo ng buntis?

May mga gamot sa ubo ng buntis na safe para sa dinadalang baby, ayon kay Dr. Jerry Villarante, MD, pathologist mula sa University of Santo Tomas College of Medicine, at doktor sa Pasig City General Hospital at Marikina Doctors Hospital. Pero ang mga medisinang ito ay hindi puwedeng inumin nang matagal na panahon.

Makakatulong din ang ilang home remedies para sa ubo na ligtas na paggamot para sa mga pregnant moms. Unahin ito bago ang anumang gamot, lalo kung hindi pa naikukunsulta sa doktor.

Ayon sa Department of Health, mas makakabuti kung maiiwasan ang anumang gamot o medisina sa unang 12 linggo ng pagbubuntis. Ito kasi ang kritikal na panahon ng development ng vital organs ng isang sanggol.

Kumunsulta muna sa doktor bago uminom ng anumang gamot.

Ilang home o natural remedies bilang gamot sa ubo ng buntis

• Apple cider vinegar. Nakakatulong ito na mapalakas ang sistema para labanan ang mga viruses. Para sa mga nagbubuntis, mabisa itong gamot sa ubo. Uminom lang ng tubig na may 1 hanggang 2 kutsara ng apple cider vinegar, 2 hanggang 3 beses kada araw.
• Luya. Mabisa ang luya para sa dry cough, lalo sa mga nagbubuntis. Nababawasan ng luya ang plema na nakakabawas din sa pamamaga o inflammation. Pakuluan ang maliit na piraso o ginayat na luya ng hanggang 15 minuto. Lagyan ng honey para mabawasan ang tapang ng lasa ng luya.
• Ligtas sa ikalawang trimester ang pagpahid ng menthol rub sa dibdib at ilalim ng ilong, at pag-inom ng cough drops o lozenges.
• Kumain ng masustansiyang pagkain sa tamang oras. Makakabuti ang mga pagkaing mayaman sa vitamin C at zinc para lumakas ang immune system. Huwag magpapalipas ng gutom, dahil dalawa kayong kumakain. Magtanong sa OB GYN ng rekumendadong prenatal vitamins na may vitamin C and zinc para sa immune system.
• Para sa sakit ng lalamunan, sumipsip ng yelo o ice cubes, at uminom ng maligamgam na tsaa, o di kaya ay magmumog ng maligamgam na tubig na may asin.
• Magpahinga. Siguraduhing may oras na magpahinga sa maghapon, at makaidlip din para makabawi sa pagod. Minsan ay pahinga lang ang kailangan ng katawan.
• Uminom ng maraming fluids. Uminom ng tubig, juice, at sabaw. Ang hydration therapy ay kailangan ng katawan para magkaron ng sapat na fluids ang katawan. Subukan ang pag-inom ng honey at lemon sa maligamgam na tubig, o sumubo ng isang kutsarang honey, na paniguradong makakapagpabuti ng pakiramdam, at makakapagpahupa sa pag-ubo.

Ugaliing maghugas ng kamay at lumayo muna sa mga taong may ubo. Pwede rin namang magsuot ng mask para hindi mahawa sa iba.

Mga gamot sa ubo ng buntis

Walang isang gamot ang ubo, pero may mga gamot at paraan para maibsan ang mga sintomas nito. Pinapaalalahanan na kumonsulta muna sa OB bago uminom ng kahit alin sa mga ito:

Dextromethorphan

Ito ay isang cough suppressant na ginagamit sa mga OTC medications tulad ng Robitussin para mabawasan ang pag-ubo. Hindi lalabis sa 120 mg sa loob ng 24 na oras ang dosage para sa mga nagbubuntis, ayon kay Dr. Robyn Horsager-Boehrer, M.D., OB GYN, sa kaniyang medical article sa UTSouthwestern Medical Center.

Guaifenesin

Karaniwang makikita ang expectorant na gauifenesin sa mga gamot sa ubo. Tumutulong ito na mapanipis ang ang mucus mula sa dibdib o lalamunan, para mas mapadali ang pag-ubo at hindi masakit.

Ang maximum dose ng isang buntis ay 2,400 mg sa loob ng 24 na oras, payo pa din ni Dr. Horsager-Boehrer.

Acetaminophen

Ligtas ang acetaminophen (Tylenol) para sa mga nagbubuntis, kung sila ay may sore throat.

Nasa 3,000 mg sa loob ng 24 hours ang maximum dose nito. Nakakatulong ang antihistamine kung ang sore throat ay sanhi ng labis na pagtulo ng sipon, dahil tinutuyo nito ang sipon.

Benzocaine

May mga spray o lozenges na may taglay na benzocaine, isang local anesthetic na nakakapagpamanhid sa lalamunan. May mga lozenges din na parang candy, na makakatulong sa ubo dahil ang pagsipsip ng hard candy ay nakakapagpadaloy sa laway, at nakakatulong na maibsan ang iritasyon at sakit sa lalamunan sanhi ng pag-ubo.

Paracetamol

Ligtas ang paracetamol para sa mga nagbubuntis, kung sumasakit ang katawan at inuubo, ayon kay Dr. Villarante. Tandaan lang na hindi ito puwedeng inumin ng matagal, o higit sa dalawang beses.

“Bawal ang malalakas na analgesic that might cause hyperacidity at ulcer, at bawal ang aspirin that can affect platelets and may cause internal bleeding, and affect platelet function,” paliwanag ni Dr. Villarante.

Nebulization ng salbutamol

Kapag inuubo, makakabuti ang nebulization at patuloy na pag-inom ng fluids, paliwanag ni Dr. Villarante. “Kung kakailanganin ng antibiotic dahil hindi pa rin nawawala ang ubo, dapat ikunsulta kaagad sa OB GYN, lalo na kapag nasa unang trimester ng pregnancy,” dagdag nito.

“Sa panahong ito kasi nade-develop ang mga organs ng fetus,” paliwanag pa ni Dr. Villarante, “and antibiotics may cause organ and systemic malformation. Usually amoxicillin is safe, pero better not take the risk.”

May mga anesthetic sore throat lozenges din na makakatulong maibsan ang sakit ng lalamunan dahil sa pag-ubo at sipon.

Mag-ingat sa mga decongestants, lalo kung hindi nirekumenda ng doktor. Ito kasi ay nagpapakitid ng blood vessels habang ginagamot ang sipon, na maaaring makaapekto sa blood vessels ng placenta.

Pagbabakuna laban sa influenza o trangkaso

Ang bakuna laban sa influenza ay mabisang proteksiyon para sa inang nagbubuntis at sa kaniyang sanggol.

Ligtas ito sa kahit anong buwan ng pagbubuntis, hanggang sa manganak at maski sa mga breastfeeding moms. Ang simpleng ubo kasi ay maaaring sintomas pala ng influenza, na maaaring may dalang panganib para sa ina at sanggol.

Kapag nagkaro'n ng trangkaso o flu kapag nagbubuntis, may panganib na maipanganak ang bata ng wala sa oras, o kaya ay mababa ang timbang ng sanggol pagkapanganak.

May posibilidad din ng stillbirth o pagkamatay sa loob ng isang linggo pagkapanganak sanhi ng mga komplikasyon.

 

SOURCES: Jerry Villarante, MD, Department of Health, Mayo Clinic, WebMD, UTSouthwestern Medical Center, UTSWmed

Basahin: Ano ang epekto ng ubo at sipon sa buntis at sa dinadalang sanggol?

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!