#AskDok: Puwede na bang bigyan ng solid food ang 4-buwang gulang na baby?

#AskDok: Puwede na bang bigyan ng solid food ang 4-buwang gulang na baby?

Inire-rekomenda ng mga pediatrician na eksklusibong breast milk lamang ang ipakain sa mga bata hanggang 6 buwang gulang. Ngunit, marami rin ang nagsasabi na maaari nang kumain ng solid food ang mga sanggol mula 4 buwang gulang. Upang malinaw ang kalituhan na nadudulot nito, aming inalam at ibabahagi ang mga nalakap na impormasyon. Alamin kung kailan pwedeng pakainin ang baby.

Kailan pwedeng pakainin ang baby ng solid food?
Dapat ay nasa tamang edad

Ayon kay Dr. Art Jerome D. Luzande, MD, ang ideal na edad ng bata para magsimulang kumain ng solid ay 6 buwang gulang. Ngunit, maaari itong mapaaga hanggang 4 buwang gulang kung makita sa kanya ang ilang mga bagay. Ang mga magiging senyales kung kailan pwedeng pakainin ang baby ay kung:

  • Kaya na niyang umupo nang hindi masyadong inaalalayan.
  • Nako-kontrol na niya ang kanyang leeg at kaya nang suportahan ang ulo.
  • Nagpapakita ng interes na kumain ng solid food.

Ayon sa World Health Organization (WHO) ito ang tinatawag na complementary feeding. Ito ay ang panahon kung kailan hindi na sapat ang sustansiyang nakukuha ng mga baby mula sa mga gatas. Dahil dito, kailangan nang dagdagan ng mga solid food ang kanyang diet. Kadalasan itong ginagawa mula 6 na buwan hanggang 18 o 24 na buwang gulang kung kailan maaaring maging malnourished ang baby.

Tamang pagkain rin ang dapat ibigay kay baby

Kung nakikitaan na ng mga senyales ang baby na maaari na itong magsimula sa solid food, ano ang dapat unahin? Inirerekumenda ni Dr. Luzande na simulan ang mga ito sa soft diet. Ibig sabihin, ang mga dapat ibigay ay ang mga pagkain na hindi kailangang nguyain masyado ng baby. Kabilang sa mga ito ay ang lugaw, baby cereals, at mga prutas at gulay na pinalambot at hiniwa sa maliliit na bahagi. Makakabuti rin na sa pagsimula ng pagpapakain ng solid food, sanayin na ang baby sa mga gulay at prutas. Sa ganitong paraan, hind mahihirapan ang mga magulang na pakainin ang anak paglaki nito.

Tandaan, wala pang sapat na ngipin ang mga baby para ngumuya ng mga matitigas na pagkain. Ang pagpapakain sakanila ng solid food ay maaaring magdulot sa choking. Huwag din muna haluan ng asukal o asin ang mga pagkain ng baby, panatilihin itong simple.

Paano ang tamang pagpapakain?
Kai-kailan kakain

Ayon sa rekumendasyon ng WHO, kahit pa sinisumulan na sa solid food, dapat paring ipagpatuloy ang pagbigay ng gatas. Ang mga nagsisimula sa solid food hanggang 8 buwang gulang ay dapat pakainin nang nasa 2-3 beses sa isang araw. Mula 9 hanggang 11 buwang gulang, itaas ito sa 3-4 na beses kada araw. Pagdating naman sa 12 hanggang 24 buwang gulang, dagdagan narin ito ng 1-2 malulusog na meryenda.

Iwasan ang allergens

Iwasan muna ang pagbibigay ng mga pagkain na maaaring allergic ang bata. Ito ay lalo na kung mayroong history ng allergy sa ilang pagkain ang pamilya. Para masuri kung may allergy ang baby na pinapasuso, ang nanay ay maaaring kumain nito at tignan kung magkaka-reaksyon ang baby mula sa breast milk. Ang mga karaniwang allergenic na pagkain ay gatas, mani, isda, itlog, shellfish, soybeans at wheat.

Pagpapalit ng pagkain

Inirerekumenda ng mga pediatricians na hayaang kainin ng bata ang pagkain nang 3 araw. Sa mga panahon na ito, makukuha ng baby ang lasa ng pagkain at magiging pamilyar ito sakanya. Bantayan lamang kung magkaroon ng reaksyon ang katawan ng baby tulad ng pagtatae, pagpapantal, o pagsusuka.

Kailan titigil

Malaki ang posibilidad na ayawan agad ng baby ang unang pagkain na ibibigay sa kanya. Ito ay dahil bago sakanya ang pakiramdam nito sa dila pati na ang nabibigay na lasa. Huwag panghinaan ng loob ngunit huwag din siyang pilitin na kumain. Sa halip, itabi ang pagkain at muling ibigay matapos ang ilang araw.

Kung hindi man maubos ng baby ang inihandang pagkain, huwag nang pilitin ito. Kung ang kanyang paglaki ay pasok naman sa akmang growth chart, ibig sabihin ay sapat na ang nakain niya.

 

Ang pagsisimula sa solid food ay magiging makalat. Kailangan ng sapat na pasensya sa baby. May mga panahon din na mahirap siyang pakainin at may mga panahon na madali. Hayaan lamang sila basta tama ang kanilang paglaki. Ngunit, dapat tandaan, bago simulan pakainin ang baby, magtanong muna sa kanyang pediatrician.

 

Source: Interview with Dr. Art Jerome D. Luzande, WHO

Basahin: Baby Food 101: Mga kailangan mong malaman sa pagpapakain kay baby

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!

app info
get app banner