Bakit importanteng makipaglaro sa ibang bata ang iyong anak?

Bakit importanteng makipaglaro sa ibang bata ang iyong anak?

Alamin kung bakit mahalaga sa pisikal at emosyonal na development ng iyong anak ang paglalaro sa labas, at ang pakikipaglaro sa ibang mga bata.

Para sa mga bata ngayon, bahagi na ng kanilang mga buhay ang paggamit ng gadgets at ng internet. Kung tutuusin, mas sanay pa nga sila sa mga gadgets na ito kumpara sa ating mga nakatatanda!

Pero paminsan ay sumosobra na sa paggamit ng mga gadgets ang mga bata, at hindi na sila nasasanay ng paglalaro sa labas, o kaya ang pakikipaglaro sa ibang mga bata.

Ating alamin kung bakit mahalaga ang mga bagay na ito, at kung ano ang magagawa ng mga magulang para maging mas active ang kanilang mga anak.

Paglalaro sa labas at sa ibang bata, hindi dapat balewalain

Hindi maikakaila na nakakatuwang gumamit ng mga gadgets. Bukod sa mga games, pwede rin itong gamitin sa social media, magtingin ng mga larawan, at magbasa ng kung anu-ano.

Bukod dito ay nagagamit rin ang mga gadgets na ito upang libangin ang mga bata. Kaya perfect na perfect ito sa mga busy na magulang.

Ngunit hindi rin nakakabuti sa development ng mga bata ang ganitong pag-aalaga sa kanila. Importante sa mga bata ang physical interaction, at ang pakikipag-usap at pakikipag-ugnayan sa kanilang mga magulang dahil dito nadedevelop ang kanilang social skills.

Kung hinahayaan lang ng mga magulang na gadget ang kasama ng kanilang anak, mahihirapan na makipag-socialize ang kanilang anak sa ibang mga bata. At sa paglaki nila ay mas mahihirapan silang makipag-usap at makipag-ugnayan sa ibang mga tao.

Kaya't importanteng bawasan ang screen time, at sa halip ay mag-focus sa paglalaro sa labas. Hindi lang ito nakakatulong sa kalusugan, nakakabuti rin ito sa emotional development ng mga bata.

Bakit mahalaga ang paglalaro kasama ang ibang bata? 

Hindi lang basta paglalaro sa labas ang mahalaga para sa mga bata. Importante na magkaroon sila ng mga kalarong ibang bata.

Ito ay dahil sa ganitong paraan sila matututo na makihalubilo, at makipag-ugnayan sa iba't-ibang mga bata na may kaniya-kaniyang ugali at personality. Malaki ang naitutulong nito sa EQ ng mga bata dahil matututo silang mag-adjust at makipagbigayan sa kanilang mga kalaro.

Bukod dito, magkakaroon rin sila ng self-confidence na dadalhin nila hanggang sila ay tumanda.

Mayroong ilang mga magulang ang umiiwas ng paglalaro sa labas ng kanilang mga anak. Ito ay dahil natatakot silang baka mapahamak ang kanilang anak. Kaya't mas gugustuhin na lang nila na nasa loob lang ang kanilang mga anak.

Hindi naman masamang isipin ang kaligtasan ng iyong anak, ngunit hindi rin mabuti na gawin silang sobrang sheltered. Normal lang sa mga bata ang madapa, o kaya masugatan habang naglalaro. Bahagi ito ng kanilang mga learning experiences, at hindi dapat ito ipagkait ng mga magulang.

Malaki rin ang naitutulong ng pagkakaroon ng mga safe space para sa mga bata. Maaaring makipag-ugnayan sa ibang mga magulang upang gawing mas safe ang playground sa inyong lugar, o kaya makipagugnayan sa barangay upang isaayos ang mga palaruan ng mga bata.

Sa ganitong paraan masisigurado ang kanilang kaligtasan, at matututong maglaro sa labas at makihalubilo ang iyong anak.

Source: Psychology Today

Basahin: Mga Palarong Pinoy na maaaring ituro sa inyong mga anak

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!

app info
get app banner