Butlig sa mukha: Ano ito at paano ba ito maaalis?

Butlig sa mukha: Ano ito at paano ba ito maaalis?

May napapansin ka bang butlig butlig sa mukha mo o sa baby? Alamin kung ano ang sanhi nito at kung paano ito matatanggal.

Kapag mainit ang panahon, maraming mga kung anu-anong naglalabasan sa balat natin—lalo sa mukha. Isa na dito ang maliliit na butlig sa mukha, leeg at pagkatapos ay sa iba’t ibang bahagi ng katawan.

Ang mga small cysts o butlig na ito ay maaaring sanhi ng ilang kondisyon.

  • Maaaring sebaceous cysts ito, o ang uri ng cyst sa balat na hindi naman cancerous. Ito ay tumutubo sa balat na binubuo ng mga likido. Karaniwang naglalabasan ito sa mukha, leeg at balakang. Ayon sa Healthline at Mayo Clinic, ang mga butlig na ito ay hindi dapat ikabahala; iyon nga lang, minsan ay makati at nakakairita, lalo kapag dumadami.
  • Mas karaniwan ang butlig na tinatawag na epidermoid cysts, na pawang non-cancerous din. Madalang kumalat at hindi naman ito masakit, kaya di dapat ikabahala.
  • Mayron ding milium cyst o milia, na mga maliliit na puting butlig na makikita sa ilong at pisngi. Karaniwang nakatumpok ang ito kaya tinatawag na milia o multiple cysts. Ito ang pinaka-karaniwan kapag mainit ang panahon, ayon kay Dr. Carolyn Chua-Aguilera, MD, isang dermatologist sa St. Luke's Hospital.
  • Madalas, ang butlig ay acne o taghiyawat na sanhi ng baradong pores sa mukha, na naimpeksiyon na ng bacteria.
tigyawat sa buntis

Sanhi ng butlig sa mukha

Ang sebaceous gland ay nagpo-produce ng oil na karaniwang kilala sa tawag na sebum. Ito ang bumabalot sa buhok at balat natin. Kapag ang gland o duct na dinadaanan ng sebum ay nasira o nabara, namumuo ang sebaceous cysts o butlig.

Minsan nagkakaron ng sira ang glands o duct kapag kinamot ng madiin, may acne o sanhi ng surgical wound.

Kapag nakulong ang keratin sa ilalim ng balat, nagkakaron naman ng milia. Ang keratin ay matapang na protein na nasa skin tissues, buhok at kuko. Ito ang butlig na karaniwang nakikita sa mga sanggol, paliwanag ni Dr. Chua.

Kapag mainit ang panahon, bumubuka ang mga pores sa mukha, kaya’t mas madaling pasukin ng dumi o bacteria. Ito ang karaniwang sanhi ng taghiyawat. Nakakadagdag din ang pagkain ng oily food, at kapag palaging oily ang mukha.

Sintomas ng butlig sa mukha

Madalas ay hindi naman masakit ang mga butlig na ito. Pero dahil nasa mukha, nakakairita at nakakailang.

Kapag malaki (higit sa 5 sentimetro) o lumalaki ang butlig, ito ang ikinababahala. Lalo’t ito ang uri ng butlig na masakit at posibleng cancerous.

Hindi normal kapag tumubo ulit ito pagkatapos tanggalin na, at kapag may nakikitang impeksiyon (pamumula, pananakit, at may nana). Kapag epidermoid cysts, may dilaw na likido ang butlig at may blackhead na nasa gitna.

Kumunsulta agad sa doktor para sa mas masusing eksaminasyon at paggamot kapag ganito ang uri ng butlig sa mukha o katawan.

Ang milia na karaniwang sa sanggol lang lumalabas, pero nakikita din sa mga bata at matatanda, ay hindi namamaga o nagtutubig. Ito ang uri na parang bungang araw, pero sa mukha makikita.

Karaniwang treatment sa butlig sa mukha

Kung hindi cancerous ang butlig, puwede nang hayaan lang, at minsan ay kusang nawawala. Ganito ang sitwasyon kapag milia sa sa mga sanggol.

Ayon kay Jasmin Bolaño, skin care specialist ng Rejuva Salon sa Timog Ave., Quezon City, para sa mga adults, may ginagawang Facial Hydration para sa mga uri ng butlig na sanhi ng allergic reaction sa gamot, o sa init ng panahon. Nililinis at pinuputok ang butlig (kung ito ay may likido sa loob), nilalagyan ng hydration mask at pinapahiran ng hydrocortisone (antibiotic ointment) laban sa impeksiyon.

Kapag cancerous, kailangang operahan para tanggalin; pero para sa “aesthetics” o pagpapaganda, may mga nagpapatanggal nito sa pamamagitan ng surgery. Pagkatapos ng surgery, kakailanganin din ng hydrocortisone at scar cream o oil para maiwasan ang peklat.

Dapat maipaliwanag ng doktor sa pasyente kung ano ang mga treatment options, para makapag-desisyon ang pasyente sa kung ano ang gusto niyang gawin. Kapag sa mukha kasi, maaaring mag-iwan ito ng peklat, kaya may mga ayaw na sumailalim sa surgery.

Para sa taghiyawat, panatilihing malinis ang mukha sa pamamagitan ng paghihilamos ng malamig na tubig at mild soap na para talaga sa mukha.

Makakatulong din ang mga herbal at natural oil tulad ng tea tree at jojoba, aloe vera, pati na ilang natural na remedyo tulad ng honey, green tea at bawang. Ang green tea ay may antioxidants na kailangan ng balat natin, kapag labis labis ang sebum sa balat. Nakakatulon din itong maisara ang mga open pores. Puwede itong inumin bilang tsaa, o kaya ay ipahid ang green tea extracts na mabibili sa botika.

 

SOURCES: Mayo Clinic, Healthline, Dr. Carolyn Chua-Aguilera, MD (dermatologist sa St. Luke's Hospital), Jasmine Bolaño (skin specialist, Rejuva Skin Care, Timog Ave., Quezon City)

Basahin: Psoriasis: Sanhi, senyales, at paraan upang maibsan ang kondisyong ito sa mga bata

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!

app info
get app banner