Paano makakatulong si daddy sa pagbubuntis ni Mommy

Paano makakatulong si daddy sa pagbubuntis ni Mommy

Tunay na challenging ang pagbubuntis para sa mga Nanay. Pero maiibsan ang lahat ng hirap na ito sa tulong ng iyong kabiyak.

Maraming hirap ang nararanasan ng isang nagbubuntis: nagiging emosiyonal dahil na rin sa raging hormones, stress dala ng pagbabago sa katawan, labis na pag-aalala, at pag-iisip tungkol sa kalusugan at kung anu-ano pa. Kaya naman ang laking ginhawa kung magiging matibay ang suportang makukuha mula sa asawa.

Ang pagtutulungan at pag-suporta sa isa’t isa sa panahong tulad ng pagbubuntis at paghahanda para sa darating na anak ay mahalaga para sa isang mag-asawa. Kung mapag-uusapang mabuti kung paano magtutulungan, mas mapagtitibay ang samahan at pagmamahalan.

Bakit kailangan ang tulong ng asawa kapag nagbubuntis?

Habang nagbubuntis, ang baby ang responsibilidad ni Nanay, kaya’t inaasahang tutulong si Tatay sa iba pang aspeto ng buhay pamilya at mag-asawa.

Maraming pwedeng iambag si Tatay: mula sa pagtulong sa pagbili ng gamot, vitamins, at pagkaing kailangan ng isang buntis, hanggang sa pagsama sa mga doctor’s appointments at pagtulong sa mga gawaing bahay.

Narito ang ilang mga bagay na pwedeng gawin ni Tatay, malaki man o maliit, para maging masaya at malusog ang disposisyon at pisikal na kalagayan ni Nanay.

1. Magbasa tungkol sa pagbubuntis

Oo, magbasa ng mga libro, magazine at articles sa parenting websites para malaman ang lahat ng kailangan tungkol sa pagbubuntis sa bawat trimester, child growth and development, parenting, at kung anu-ano pa.

Marami kasing mga bagay na maaaring hindi pa alam ng isang lalaki, tulad na lang ng kung bakit parang palaging pagod ang asawa, lalo sa una at huling trimester, pero energetic naman sa ikalawang trimester.

Kung may sapat na kaalaman tugkol sa kalagayan at pinagdadaanan ng asawa (pati na ng magiging anak), makakatulong ang lalaki sa mga mahalagang desisyon na kailangang gawin tulad ng mga prenatal tests, pagpili ng ospital at ng pedia, at iba pa.

2. Asahan ang pagbabago kay misis.

Hindi lang pagbabagong pisikal ang dala ng pagbubuntis; magiging sobrang emosyonal din ito at madalas ay madamdamin pa. Isang emotional rollercoaster, ika nga, ang pagdadaanan ng isang nagdadalantao. Malaki ang pagbabago, na parang hindi mo na siya kilala. Kaya’t kung sabihin niyang ayaw niyang kainin ang dati’y alam mong paborito niyang putahe, o umupo sa paborito niyang lugar man lang sa isang restawran, kailangang intindihin na lang siya. Kung mas gusto niyang matulog sa tanghali, hayaan siya. Habang lumalaki ang sanggol sa sinapupunan, bumababa ang energy level ng isang nagbubuntis, lalo na sa una at huling trimester. Pahinga at pang-unawa ang pinaka-importante sa isang nagbubuntis.

Ito ay isang napaka-sensitibong panahon para sa isang babae, kaya’t ngayon, higit kailanman, ay dapat lang na ibuhos ang pagmamahal sa iyong kabiyak. Siya ang nagdadala ng sanggol sa loob ng 9 na buwan, at siya ang nakakaranas ng lahat ng pagbabago.

Paano makakatulong si daddy sa pagbubuntis ni Mommy

3. Bigyan siya ng oras para makapag-pahinga.

Sa isang pag-aaral ng mga dalubhasa, sinabing ang mga babae ay nangangailangan ng mas mahabang oras ng tulog kaysa mga lalaki. Ang babae raw ang palaging gumagawa ng maraming bagay ng halos sabay-sabay. Kayang kaya niyang mag-multi-tasking, kaya mas gumagamit sila ng brain power kaysa mga lalaki. Kung totoo man ito, lalo ngang kailangang makapagpahinga ang isang nagbubuntis.

Kaya’t mga asawang lalaki, hayaang makatulog ang asawang nagbubuntis nang hanggang gusto niya. Tulungan din siya sa mga gawaing bahay, para mabawasan ang alalahanin niya.

4. Asahan ang paglilihi—lalo ang paghahanap ng mga pagkaing kakaiba.

Intindihin ang mga food cravings ng asawa, pati na rin ang pagkayamot sa ibang pagkain at kahit amoy man lang. Maaaring yung dating pritong manok na paborito niya ay biglang ayaw niya, kahit amoy man lang, huwag nang ikagulat dahil natural lang ito. Hindi rin sinasadya ng isang nagbubuntis ang pagiging maselan sa amoy at uri at lasa ng pagkain na gusto niyang kainin. Dahil nga sa hormonal change, nagkakaron siya ng mga gusto at ayaw, na malayo sa gusto at ayaw niya dati. Intindihin siya at habaan ang pasensya dahil lilipias din naman ito. Ang mahalaga ay hindi siya ma-stress at maging masaya ang disposisyon niya, para hindi din ma-stress ang sanggol. Huwag na huwag piliting kainin ang pagkain hiniling niya, binili mo, pagkatapos ay inayawan niya. Maniwala kang kapag pinilit ang ayaw niya, lalo na ang amoy, mahihilo ito at sasama ang pakiramdam.

Kung ayaw din niya ang amoy ng pabango mo, o amoy ng kinakain mo, isantabi muna ito para mapagbigyan ang asawa.

5. Pakinggan siya, at mga hinaing niya.

Hindi lang kapag buntis, kundi palaging dapat mag-usap at makinig sa kabiyak. Pero dapat sana ay mas lawakan ang pang-unawa at mas habaan ang pasensiya kapag nagbubuntis si misis. Dahil na rin sa hormonal change, sobrang sensitibo si misisi kapag buntis. Kaya’t mga mister, intindihin na lang ang pabago-bagong isip, pagiging moody, at pakinggan ang mga daing o pagsasabi niya ng mga nararamdaman niya.

Natural na nag-aalala palagi ang isang ina kung okay ba ang sanggol sa sinapupunan, o may problema kaya ito. Dagdag pa ang takot sa oras na ng panganganak—normal ba o CS, masakit ba, at higit sa lahat, magiging mabuting ina kaya siya? Tapos iniisip din niya ang gastos—kung sapat na ba ang nakatabing pera, o baka kulangin.

Suportahan si misis at palaging kausapin na huwag mag-alala, dahil magkatuwang kayo sa lahat at nariyan ka para alagaan at tulungan ang mag-ina sa lahat ng panahon.

Mag-isip din ng mga bagay na makakapag-aliw sa kaniya tulad ng pamimili ng mga bagong gamit para sa baby. Kausapin ang sanggol sa tiyan, samahan si misis sa doktor kapag may check-up, palaging kumustahin at alamin kung ano ang kailangan at gusto.

6. Samahan si misis sa mga doctor’s appointment.

Gawin sana ang lahat ng makakaya para masamahan siya sa kaniyang mga pre-natal check-up. Kung may mga pagkakataon na hindi talaga pwede, siguraduhin lang na makakasama siya sa susunod, o di kaya’y maihatid man lang siya sa pagpunta. Alamin kung aling mga check-up ang importanteng nandun ka, tulad ng appointment para sa ultrasound sa ika-20 linggo, kung kailang maririnig ang tibok ng puso ng sanggol. Ang pagsama sa mga prenatal checkup ay pagkakataon din para malaman kung ano ang mga kailangan ni misis, at para din malamang ang kalagayan niya.

7. Magplano ng magkasama.

Isipin mo ang lahat ng maaaring inaalala ng asawa: Ano ang pangalan ng bata? Sapat na ba ang perang naipon para sa panganganak? Paano kapag CS, kaya ko kaya? Paano ang trabaho ko? Sino ang mag-aalaga sa bata pagkapanganak ko, at pagbalik ko sa trabaho? Kukuha ba ako ng yaya?

Lahat ng ito, at marami pang iba, ang nasa isip ng isang nagbubuntis. Kaya naman mahalagang may nakakausap siya, at may makakasama sa pagdedesisyon.

8. Mahalin siya—at siguraduhing maipapakita at maipaparamdam ito sa kaniya.

Walang masama kung ma-spoil si misis paminsan-minsan. Mag-date kayo: dalhin siya sa isang espesyal na restawran, manood ng sine, ipag-shopping siya.

Napakaraming pwedeng gawin para sa kaniya, at para maging positibo at masaya ang disposisyon niya. Kasama na rin dito ang pagpapatibay ng bond o pagsasama ng mag-asawa. Hayaan din siyang lumabas kasama ang mga kaibigan, o magpunta sa salon para magpa-spa o magpaganda.

Kung ito ang unang anak, lalong kailangang magbuhos ng panahon at maghanap ng pagkakataon na magkasama kayo ng mas mahabang oras, dahil kapag nagka-baby na, iba na ang magiging prayoridad ninyo.

9. Kumuha ng birthing classes nang magkasama

Huwag lang magbasa—sumama din sa birthing classes para mas mapagtibay ang pagsasama ninyo. Si misis ang magluluwal sa anak ninyo. Ang pagsama sa kaniya para maintindihan kung paano ang panganganak at ano ang gagawin sa oras na lalabas na ang bata, ang isang napakahalagang magagawa ng isang tatay para sa kaniyang mag-ina. Mas madaling malalagpasan ang hirap kung magkahawak kayo ng kamay sa buong proseso.

Dito rin maiintindihan na ang suporta ng isang lalaki sa kaniyang asawa sa pagbubuntis nito ay hindi lang emosiyonal, at lalong hindi lang pinansiyal, kundi pisikal din.

10. Magkasamang maghanda ng birth plan.

Tumulong sa pagbuo ng birthing plan. Pag-usapan kung paano nga ba niyo gustong iluwal ang bata. Pareho ba kayo ng gusto? Kung hindi, kailangang pag-usapan kung ano ang gagawin.

Kung biglang CS ang magiging paraan ng panganganak, paano mo siya susuportahan? Kung dumating ang pagkakataon na hindi kayang mag-desisyon ng babae dahil naka-anesthesia na siya, o labis ang sakit na nararamdaman niya, paano ka magdedesisyon kung di mo alam ang birthing plan? Ito ang ilan sa mga bagay na kailangan ninyong planuhin at pag-usapan bago pa man ang araw ng panganganak. Magtanong sa OB GYN ng asawa kung ano ang iba pang bagay o posibleng maging problema na dapat ninyong paghandaan.

11. Tulungan siya sa panganganak.

Karamihan na sa mga ospital ngayon ay pinapayagan ang mga lalaki sa loob ng delivery room. Kung may ganitong pagkakataon, gamitin ito para matulungan ang asawang kumalma. Hindi biro ang labour, kaya naman lahat ng suporta ay kakailanganin ng babae.

Aralin kung paano at saan dapat masahehin ang kabiyak habang nanganganay ito. Maghanda na hagurin ang likod, binti, braso, tumulong sa pagbibihis, o hawakan ang kamay ni misis habang nahihirapan sa pag-iri o sa labour.

Napapanood natin sa mga pelikula ang mga senaryong galit na galit pa ang babae sa asawa at kahit anong tulong ng lalaki, ay parang hindi pa ito napapansin ng babae, bagkus namumura pa minsan. Tandaan na sensitibong panahon ito, at nasa labis na paghihirap ang asawa, kaya’t huwag itong damdamin. Lahat ng nanganganay ay hindi na alam ang sinasabi o ginagawa dahil nga sa sakit ng buong katawan sa mga oras na iyon. Maging matibay at huwag kumurap sa pag-suporta kay misis.

Oras na maipanganak na ang sanggol, maiibsan na lahat ng sakit at hirap, at mapapahinga na rin si misis. Bigyan siya ng pagkakataon at oras na huminga at magpahinga. Huwag lalayo, dahil anumang oras ay maaaring hanapin ka at kailanganin ang pag-aaruga at pagmamahal mo.

Sadyang napakadami at napakalaki ng responsibilidad at obligasyon ng isang lalaki sa kaniyang mag-ina. Pero tandaan na lahat ng ito ay may kapalit na kaligayahan sa oras na makitang ligtas si nanay at baby. Dapat pang magpapatuloy ang suportang ito pagkapanganak, kaya’t huwag na huwag mapapagod. Kung nariyan si tatay mula pa lamang sa pagbubuntis, hanggang sa unang minuto ng buhay ng bata, malalim ang magiging impact nito sa buhay di lamang ng sanggol kundi lalo pa sa iyong kabiyak.

 

Sources: Babble, WebMD

Ang article na ito ay unang isinulat ni Deepshikha.

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!

Sinulat ni

Deepshikha Punj

Article Stories
app info
get app banner