Paano ba mawawala ang sinok ni baby? Alamin ang mga tamang paraan rito.
Mababasa sa artikulong ito:
- Bakit nagkakasinok ang baby?
- Totoo bang kapag naglagay ng lipstick o sinulid sa noo, titigil ang sinok?
- Tips kung paano mawala ang sinok ni baby
Normal lang na pangyayari ang sinisinok. Nangyayari ito sa mga bata, pati na rin sa mga nakatatanda. Kadalasan, wala naman itong dinudulot na masama.
Minsan, inaakala natin na hindi komportable si baby dahil dito, pero sa katunayan ay wala namang nararamdaman si baby tuwing sinisinok siya.
Ang sinok ay nangyayari kapag naiipit ang diaphragm at sumasara ng mabilis ang vocal cords. Ito ang nagdudulot ng hiccups o pagsinok.
Alam niyo ba na ang mga babies ay hindi nagigising kahit sinisinok sila? Talagang wala itong negatibong epekto para sa kanila.
Paano mawala ang sinok ni baby?
Bakit nagkakasinok ang baby?
Sa isang pag-aaral noong 2012, sinasabing ang pagkakaroon ng hiccup reflex ay maaaring dahilan para mawala ang excess na hangin mula sa tiyan ng isang sanggol.
Subalit ayon naman sa medical community, wala pa rin talagang nakaalam kung bakit o ano ang purpose ng pagkakaroon ng hiccups o sinok sa mga baby.
Nangyayari ang sinok sa baby kapag mayroong nagdudulot sa diaphragm ng spasm at ang vocal cords ay biglang hindi magpa-function ng maayos.
Ang hangin ang pumupuwersa palabas papunta sa saradong vocal chords, na naglilikha ng tunog ng sinok ni baby.
Wala pa talagang nakakaalam ng sanhi sa sinok ni baby pero minsan inuugnay ito sa diaphragm spasm. Maaari itong mangyari kapag marami kang napapakain sa iyong baby, mabilis kumain si baby, at kung nakakalunok siya ng hangin.
Ang mga bagay na ito ay maaaring magdulot para lumaki ang tiyan ng baby. Sa pag-expand nito, itinutulak nito ang hangin papunta sa diaphragm, na nagpapa-trigger sa spasm na magdudulot ng sinok o hiccups kay baby.
Sumang-ayon naman si Dr. Jennifer Tiglao, isang pediatrician mula sa Makati Medical Center na ang sinok ay maaring may kinalaman sa diaphragm ni baby.
“Ang hiccups normal naman ‘yan. It happens din and has something to do sa nerves sa diaphragm. Minsan nati-trigger ‘yan, kapag na-trigger iyan, ayan ‘yong nerves sa diaphragm nagkakaroon ng hiccups.” paliwanag niya.
Kapag madalas na nagkakaroon ng sinok si baby at nagdudulot na ito ng hirap at pagkabaliksa, maaari mayroong ibang dahilan o sakit na nagdudulot nito, gaya ng gastroesophageal reflux (GER).
Nangyayari ito kapag nakakain si baby ng mga pagkaing maraming acid. Kapag ang fluids na ito ay dumaan sa diaphragm, maaari itong maka-irritate at mag-trigger ng spasms.
Tips kung paano mawala ang sinok ni baby
1. Padighayin si baby
Kadalasan, hindi na kailangan ng gamot sa sinok ni baby. Tanging ang pagpapadighay lang sa kanila ang solusyon dito.
Minsan, sinisinok si baby habang siya ay umiinom ng gatas. Kapag nangyari ito, itigil muna ang pagpapadede kay baby at padighayin muna siya. Nakakatulong ito upang mawala ang pagsinok.
Nakakatulong din na itayo ng diretso si baby upang mabilis na lumabas ang gas sa kanyang tiyan.
Tip: Dahan dahang hilutin ang kanilang likod mula sa baywang hanggang balikat habang nakaupo si baby. Kung hindi ito gumana, subukan tapikin ng dahan-dahan ang kanilang likod. Mabuting gawin ito sa isang matibay at hindi maalog na upuan.
2. Bigyan ng pacifier si baby
Kung hindi gumana ang pagpapagdighay kay baby, pwede kang gumamit ng pacifier upang mawala ang sinok. Ito ay dahil nakakatulong ang pacifier para ma-relax ang diaphragm niya.
Paano mawala ang sinok ni baby? | Image from Dreamstime
BASAHIN:
3 tested tips to wean a premature baby
Epekto ng matamis na pagkain sa bata, nakakasama nga ba?
ALAMIN: Common skin rashes sa baby at bata tuwing mainit ang panahon
3. Padedehin si baby
Kung gusto mong ipagpaliban ang pagbibigay ng pacifier kay baby, mas makabubuting padedehin na lang siya kapag siya ay sinisinok. Ito rin ang payo ni Dr. Tiglao.
“I advise mothers to breastfeed. Kapag sinisinok padedehin mo, dire-diretso hanggang sa makalimutan niya na ang suminok.”
4. Patawanin si baby
Kung ayaw mawala ng sinok ni baby, pwede mo silang patawanin o abalahin para hindi nila mapansin na sinisinok na pala sila. Pwede mo ring i-hele ang iyong sanggol para ma-relax siya.
Tip: Maghanap ng gawain na magpapakalma kay baby sa halip na magpapalikot sa kanya.
5. Antayin lang itong mawala
Kung wala pa ring gumanang solusyon, mabuting hayaan na lang na mawala ang sinok ni baby. Madalas, nawawala ang sinok sa loob ng 10 minuto.
Ngunit kung sobrang tagal bago mawala ang sinok ni baby, at mukhang hindi na sya komportable dahil dito, mabuting magpakonsulta na sa doktor.
Tip: Huwag pansinin ang sinok ni baby. Kadalasan, mawawal rin ito pag hinayaan lang.
Paano mawala ang sinok ni baby?
Paglalagay ng sinulid sa noo at ibang pang hindi dapat gawin
Ayon sa matatanda, kapag sinisinok ang bata, pwedeng maglagay ng sinulid o kaya sulatan ng lipstick ang kaniyang noo. Pero paglinaw ni Dr. Tiglao, walang medikal na basehan ang paraang ito at paniniwala lang ng matatanda.
Ang sinok ay nanggagaling sa diaphragm at walang kinalaman ang noo. Subalit kung gagawin mo ito para ma-distract ang iyong sanggol, pwede mo namang subukan kung gusto mo.
Narito pa ang mga bagay na hindi makakatulong kapag may sinok ang baby:
- Huwag pisilin ang ilong ni baby dahil pwede siyang masaktan, at pwede rin siyang hindi makahinga.
- Sa mga sanggol na wala pang anim na taong gulang, iwasang bigyan siya ng tubig na inumin.
- Huwag takpan ang ilong at bibig ni baby dahil hindi siya makakahinga.
- Iwasang bigyan si baby ng peppermint, lemon, vinegar, peanut butter o pickle juice dahil makakasama ito sa kaniyang kalusugan.
- Huwag mong gulatin si baby dahil baka lalo lang siyang mahirapan at mapagod.
Kung may pangamba, huwag mag atubiling kumonsulta sa iyong doktor para sa gamot sa sinok ni baby. Dito mabibigyan siya ng tamang lunas at payo kung paano mawala ito.
Paano maiiwasan ang pagkakaroon ng sinok ni baby?
Ang sinok ay hindi laging maiiwasan, pero sa pagsunod sa mga strategy na ito ay maaari itong makatulong kay baby at sa ‘yo.
- Pakainin si baby bago pa siya magutom, para maging kalmado siya.
- Makakatulong din na pakainin si baby ng madalas pero kaunting amount lamang ng pagkain.
- Ang pagpapaupo kay baby ng tuwid isang oras pagkatapos kumain ay maaari ring makatulong sa kaniya.
- Ang paglilipat ng posisyon ng bote (kung bottle-fed si baby) ay makakatulong rin para walang makapasok na hangin sa kaniyang tiyan.
- Siguruhing ang buong bibig niya ang naka-latch sa buong nipple o sa kaniyang feeding bottle.
Kailan dapat magpatingin sa doktor?
Hindi naman nakakabahala ang pagsinok ni baby lalo na sa mga baby na 12 months pababa. Kausapin ang pediatrician ni baby kung madalas niya itong nararanasan.
Maaari kasing may underlying condition kung bakit ito nangyayari. Katulad nga ng nabanggit kanina na GER.
Ang palatandaan ng pagkakaroon ng GER sa isang baby ay ang mga sumusunod:
- Madalas ang pag-iyak kaysa sa karaniwan, lalo na kapag sa pinapapadede siya.
- Nagsusuka kaysa sa normal.
Kung ikaw ay nasusupetsiya na mayroong GER ang iyong anak ay agad na pumunta sa doktor upang mapagamot siya.
Isinalin sa Filipino ni Alwyn Batara
Dagdag ulat mula kay Marhiel Garrote
Translated with permission from theAsianparent Singapore
Source:
Medical News Today
Dito sa theAsianparent Philippines ay mahalaga sa amin ang makapagbigay ng impormasyon na wasto, makabuluhan at napapanahon ngunit hindi ito dapat gawing pamalit sa payo ng doktor, o kaya sa medical treatment. Walang pinanghahawakang responsibilidad ang theAsianparent Philippines sa mga nagnanais na uminom ng gamot base sa impormasyon sa aming website. Kung mayroong agam-agam, ay nirerekomenda naming magpakonsulta sa doktor upang makakuha ng mas malinaw na impormasyon.
May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!
