4 warning signs ng depresyon ng mga ina

Sintomas ng depresyon sa mga ina na mahalagang malaman ng mga taong nakapaligid sa kaniya upang agad na malunasan at hindi na lumala pa.

Image from Freepik

Sa ginanap na “Break the Stigma” event, na bahagi ng mental health awareness campaign ng Upjohn, ang off-patent division ng Pfizer ay nabigyan ng pagkakataon ang theAsianparent Philippines na makapanayam sina Riyan Portuguez isang psychologist at Dr. Robert Buenaventura, isang psychiatrist.

Ang interview ay tungkol sa mga sintomas ng depresyon na mapapansin sa mga bagong silang na ina. Ito ay napakahalagang malaman ng mga taong nasa paligid niya upang ito ay agad na malunasan at hindi na lumala pa.

Ayon kay Dr. Robert Buenaventura, isang psychiatrist, normal lang na makakaranas ng baby blues o temporary depression ang mga bagong panganak na ina. Ngunit dapat daw ito ay agad na nawawala sa loob ng 2-3 araw. Dahil kung ito ay hindi nawala o mas nag-improve sa susunod na mga araw, ito ay senyales na kailangan ng mabigyan ng atensyon ang ina lalo na ang mental health niya.

“Normal postpartum blues should last usually 2-3 days dapat sa 2nd at 3rd day nag-iimprove na siya. Pero kung after 3 days lumalala ang symptoms then iyon na ang critical na period. That’s when the mom should be referred to a psychiatrist.”

Ito ang pahayag ni Dr. Buenaventura.

Para naman kay Riyan Portuguez, isang psychologist, mahalaga na malaman ng bawat isa sa atin ang sintomas ng depresyon. Lalo na sa mga bagong silang na ina na madalas ng nakakaranas ng post-partum depression na maaring mauwi sa post-partum psychosis kung mapabayaan. At ang isang paraan umano para matandaan ang sintomas ng depresyon ay sa pamamagitan ng paggamit ng sumusunod na 4D’s.

1^st D ay ang Distress.

Ayon kay Portuguez, ang distress ay matutukoy kung ang indibidwal ay nakakaranas ng negative feelings na nakakaapekto sa kaniyang sarili o kaya naman sa mga taong na nasa paligid niya.

Para kay Dr. Buenaventura sa mga babaeng bagong panganak ang mga sintomas nito ay ang pagiging malungkot at matamlay. Pati na ang kawalan ng interaction ng ina sa kaniyang baby.

2^nd D ay Dysfunctional

Ang sumunod na D ay ang pagiging dysfunctional na tumutukoy sa significant change ng behavior ng isang tao. Ito ay kapag tumigil na siyang gawin ang mga dati niyang ginagawa o hindi na siya nakikisalamuha sa mga taong nasa paligid niya.

Tulad nalang ng wala siyang ganang kumain, hindi siya makatulog ng maayos at mas gusto niyang mag-isa na kung saan minsan mapapansin na umiiyak na lamang siya bigla.

3^rd D ay Deviance

Ayon kay Portuguez, ang deviance ay mapapansin sa isang tao kapag nagiging unusual ang behavior niya. Sa mga ina ito ay mapapansin sa pamamagitan ng paraan kung paano niya inaalagaan o kung paano siya nagkakaroon ng interaction sa kaniyang baby.

“This is the mom asking about the baby, kumusta ang ang baby? ano ang feeling ng baby? Gusto niyang i-hug yung baby. Gusto niyang makita yung baby. Then that’s a good sign. Pero kung parang very apathetic yung mom towards the baby, yung hindi niya kinakumusta. Then wala siyang attempt na i-breastfeed o i-bottle feed yung baby so that’s very critical. Very withdrawn siya.”

Ito ang pagbibigay halimbawa ni Dr. Buenaventura sa nasabing sintomas ng depresyon.

4^th D ay Danger

Ang huling D ayon kay Portuguez ay ang dangerousness o kapag makikitang gumagawa ng possible harm ang isang tao sa kaniyang sarili o sa mga taong nasa paligid niya.

Dagdag ni Portuguez, ang 4D’s umano ang pinakamadaling paraan para matukoy kung nakakaranas ng depresyon ang isang tao. At ang sinumang nagpapakita ng 2 o 3 sa mga ito ay dapat ng makipag-usap sa isang psychiatrist o psychologist na makakatulong para maibsan ang kaniyang sintomas at maiwasan pa ang paglala nito. Dahil ika ng mga eksperto ay mabuti ng maging preventive kaysa maging curative. Lalo na sa mga kondisyon na tulad ng depresyon na madalas na nagiging dahilan upang kitilin ng isang tao ang sarili niyang buhay.

Source: Quizlet

Basahin: Paano nalalampasan ang depresyon kapag nanay ka na?